പാക് മിസൈല്‍ പരീക്ഷണം : സംഘര്‍ഷം അതിരൂക്ഷം

ദില്ലി : ഷഹീന്‍ മിസൈലുകള്‍ പരീക്ഷിയ്ക്കാനുളള പാകിസ്താന്‍ തീരുമാനത്തോടെ അതിര്‍ത്തിയിലെ സംഘര്‍ഷം അതിരൂക്ഷമായി. മെയ് 25 മുതല്‍ 28 വരെയാണ് മിസൈല്‍ പരീക്ഷണം നടക്കുന്നത്. ലോകരാഷ്ട്രങ്ങളുടെ എതിര്‍പ്പ് അവഗണിച്ചാണ് പാകിസ്താന്റെ ഈ നീക്കം.

ഷഹീന്‍, ഷഹീന്‍ - ഒന്ന് എന്നീ ഹ്രസ്വ-മദ്ധ്യ ദൂര മിസൈലുകളാണ് പരീക്ഷിയ്ക്കുന്നത്. ഷഹീന്‍ 300 കിലോമീറ്റര്‍ റേഞ്ചുളളതും ഷഹീന്‍ - ഒന്ന് 750 കിലോമീറ്റര്‍ റേഞ്ചുളളതുമാണ്. ഇവ ഒരിയ്ക്കല്‍ പരീക്ഷിച്ചതാണ്. അന്തിമ പരീക്ഷണം ഇതുവരെ നടന്നിട്ടില്ലെന്ന് സൈനിക കേന്ദ്രങ്ങള്‍ പറയുന്നു.

മിസൈല്‍ പരീക്ഷണങ്ങള്‍ പരസ്പരം അറിയിക്കണമെന്ന ലാഹോര്‍ കരാറിന്റെ അടിസ്ഥാനത്തിലാണ് പാകിസ്താന്‍ ഈ വിവരം ഇന്ത്യയെ അറിയിച്ചത്. അതിര്‍ത്തിയിലെ സംഘര്‍ഷവുമായി മിസൈല്‍ പരീക്ഷണത്തിന് ബന്ധമില്ലെന്ന് പാകിസ്താന്‍ അവകാശപ്പെടുന്നു.

എന്നാല്‍ ആഭ്യന്തര സമ്മര്‍ദ്ദം മൂലം നടത്തുന്ന മിസൈല്‍ നാടകമാണിതെന്നാണ് ഇന്ത്യയുടെ നിലപാട്.

യുദ്ധഭീതി നിലനിര്‍ത്തിയ്ക്കൊണ്ട് അതിര്‍ത്തിയില്‍ പാകിസ്താന്‍ വന്‍ സൈനിക സന്നാഹങ്ങള്‍ നടത്തുകയാണ്. 11 കോര്‍ സൈനികരെക്കൂടി കഴിഞ്ഞ ദിവസം വിന്യസിച്ചു. അഫ്ഗാന്‍ അതിര്‍ത്തിയിലെ സൈന്യത്തെ പിന്‍വലിച്ചാണ് ഇന്ത്യയുടെ അതിര്‍ത്തിയില്‍ സജ്ജീകരിച്ചത്.