ആണവയുദ്ധം വന്നാല്‍ മരണം 30 ലക്ഷം

പാരീസ് : ഇന്ത്യയും പാകിസ്താനുമായുളള നിയന്ത്രിത ആണവയുദ്ധം പോലും 30 ലക്ഷം പേരെ കൊല്ലുമെന്ന് പഠന റിപ്പോര്‍ട്ട്. 14 ലക്ഷം പേര്‍ക്ക് പരിക്കേല്‍ക്കും.

ആണവ ആക്രമണം ഇന്ത്യയില്‍ 17 ലക്ഷം പേരുടെ മരണത്തിനിടയാക്കും. ഒമ്പത് ലക്ഷം പേര്‍ക്ക് ഗുരുതരമായ പരിക്കേല്‍ക്കും. പാകിസ്താനില്‍ ഈ കണക്ക് യഥാക്രമം 12ലക്ഷവും ആറു ലക്ഷവുമാണ്.

അമേരിക്കയിലെ പെന്റഗണ്‍ സര്‍വകലാശാലയിലെ വിദഗ്ദ്ധര്‍ നടത്തിയ പഠനത്തിലാണ് ഈ നിഗമനം. ഭാവിയില്‍ ആണവവികിരണം നിമിത്തം കാന്‍സറടക്കമുളള മാറാരോഗങ്ങള്‍ പിടിപെട്ട് മരിക്കേണ്ടി വരുന്നവരുടെ കണക്ക് ഇതില്‍ ഉള്‍പ്പെടുത്തിയിട്ടില്ല.

ഹിരോഷിമയില്‍ 1945ല്‍ പതിച്ച ബോംബുകളുടെ 10 മടങ്ങ് ശേഷിയുളള ബോംബുകള്‍ ഇന്ത്യയിലെയും പാകിസ്താനിലെയും 10 പ്രധാന നഗരങ്ങള്‍ക്ക് 600 മീറ്റര്‍ മുകളില്‍ വച്ച് പൊട്ടിത്തെറിച്ചാലാണ് ഇത്രയും പേര്‍ മരിക്കുന്നത്. എന്നാല്‍ ബോംബുകള്‍ വീണു പൊട്ടുന്നത് ഭൂമിയിലാണെങ്കില്‍ ആണവ പൊടിപടലങ്ങള്‍ നിമിത്തം മരണസംഖ്യ ഇതിന്റെ ഇരട്ടിയോളമാകും.

ബാംഗ്ലൂര്‍, കൊല്‍ക്കൊത്ത, ദില്ലി. ചെന്നൈ, മുംബൈ എന്നിവയാണ് ഇന്ത്യയില്‍ ആണവ ആക്രമണ ഭീഷണിയുളള നഗരങ്ങള്‍. ഫൈസലാബാദ്, റാവല്‍പിണ്ടി, ഇസ്ലമാബാദ്, ലാഹോര്‍, കറാച്ചി എന്നിവയാണ് ആണവ ഭീഷണി നേരിടുന്ന പാക് നഗരങ്ങള്‍.

പശ്ചിമ വാതം വീശുന്ന സമയമായതിനാല്‍ ഇന്ത്യയ്ക്കാവും നാശനഷ്ടങ്ങള്‍ കൂടുതല്‍ ഉണ്ടാകുന്നതെന്നും പഠനറിപ്പോര്‍ട്ട് മുന്നറിയിപ്പു നല്‍കുന്നു.