യുദ്ധമൊഴിവാക്കാന് ബ്രിട്ടന് ഇടപെടുന്നു
ഇസ്ലാമബാദ്: ഇന്ത്യയും പാകിസ്ഥാനും തമ്മില് യുദ്ധം ഒഴിവാക്കാനുള്ള ശ്രമത്തിന്റെ ഭാഗമായി ബ്രിട്ടന്റെ വിദേശമന്ത്രി പാകിസ്ഥാനിലെത്തി. മെയ് 28 ചൊവാഴ്ച പാകിസ്ഥാനിലെത്തിയ ബ്രിട്ടന്റെ വിദേശകാര്യമന്ത്രി ജാക് സ്ട്രോ പാക് പ്രസിഡന്റ് മുഷാറഫുമായി കൂടിക്കാഴ്ച നടത്തും.
പാകിസ്ഥാന് വിദേശമന്ത്രി അബ്ദുള് സത്താറുമായും ഇദ്ദേഹം ചര്ച്ച നടത്തും. പാകിസ്ഥാനിലെ സന്ദര്ശനം പൂര്ത്തിയായാല് ഇദ്ദേഹം നേരെ ഇന്ത്യയിലേക്ക് തിരിക്കും. കശ്മീരിനെച്ചൊല്ലി ഇന്ത്യയും പാകിസ്ഥാനും ഒരു യുദ്ധത്തിലേക്ക് നീങ്ങുന്നത് തടയാനുള്ള അന്താരാഷ്ട്രശ്രമത്തിന്റെ ഭാഗമാണ് ജാക് സ്ട്രോയുടെ ഈ സന്ദര്ശനം.
യാതൊരു തരത്തിലും പാകിസ്ഥാന്റെ മണ്ണില് നിന്നും തീവ്രവാദം കയറ്റുമതി ചെയ്യില്ലെന്ന് കഴിഞ്ഞ ദിവസം രാജ്യത്തോട് നടത്തിയ അഭിസംബോധനയില് മുഷാറഫ് വ്യക്തമാക്കിയിരുന്നു. കശ്മീരിലേക്കുള്ള നുഴഞ്ഞുകയറ്റത്തെ പാകിസ്ഥാന് യാതൊരു വിധത്തിലും പ്രോത്സാഹിപ്പിക്കില്ലെന്ന മുഷാറഫിന്റെ പ്രസ്താവന കാര്യങ്ങള് യുദ്ധത്തിലേക്ക് നീങ്ങില്ലെന്നതിന്റെ സൂചനയാണെന്ന് വിദഗ്ധര് വിലയിരുത്തുന്നു.
യുദ്ധം ഒഴിവാക്കാന് റഷ്യന് വിദേശമന്ത്രി അനറ്റോലി സഫൊനോവും പാകിസ്ഥാനിലെത്തിയിട്ടുണ്ട്. ഇന്ത്യയും പാകിസ്ഥാനും പ്രശ്നങ്ങള് പരസ്പരം ചര്ച്ച ചെയ്യണമെന്ന് കഴിഞ്ഞ ദിവസം റഷ്യന് പ്രസിഡന്റ് വ്ലാഡിമിര് പുടിന് അഭിപ്രായപ്പെട്ടിരുന്നു. കസാഖ്സ്ഥാനില് ജൂണ് മൂന്നു മുതല് അഞ്ചുവരെ നടക്കുന്ന ഏഷ്യന് സഹകരണ കൗണ്സില് യോഗത്തിനെത്തുമ്പോള് വാജ്പേയിയും മുഷാറഫും പരസ്പരം കൂടിക്കാഴ്ച നടത്തണമെന്നാണ് പുടിന് നിര്ദേശിച്ചിരിക്കുന്നത്.