ഹയര്‍ സെക്കന്ററി പ്രിന്‍സിപ്പല്‍ നിയമനം അനിശ്ചിതത്വത്തില്‍

തിരുവനന്തപുരം: ഒരാഴ്ചയ്ക്കുള്ളില്‍ സര്‍ക്കാര്‍ പുറപ്പെടുവിച്ച രണ്ട് ഉത്തരവുകളെ തുടര്‍ന്ന് ഹയര്‍ സെക്കന്ററി സ്കൂള്‍ പ്രിന്‍സിപ്പല്‍മാരുടെ നിയമനം സംബന്ധിച്ച് അനിശ്ചിതത്വം തുടരുന്നു.

ഹയര്‍ സെക്കന്ററി സ്കൂളിലെ ഏറ്റവും സീനിയറായ അധ്യാപകന് താത്കാലികമായി പ്രിന്‍സിപ്പല്‍ സ്ഥാനം ഏറ്റെടുക്കാമെന്നായിരുന്നു മെയ് 21ന് പുറപ്പെടുവിച്ച ഉത്തരവില്‍ പറഞ്ഞിരുന്നത്. ഉത്തരവ് അനുസരിച്ച് ചില സ്കൂളുകളില്‍ അധ്യാപകര്‍ പ്രിന്‍സിപ്പാലിന്റെ താത്കാലിക ചുമതല ഏറ്റെടുത്തതിന് ശേഷമാണ് മെയ് 21ലെ ഉത്തരവ് റദ്ദാക്കിക്കൊണ്ട് മെയ് 27ന് അടുത്ത ഉത്തരവുണ്ടായത്.

ഹയര്‍ സെക്കന്ററി പ്രിന്‍സിപ്പല്‍മാരെ നിയമിക്കുന്നതു സംബന്ധിച്ച പ്രത്യേക ചട്ടങ്ങള്‍ക്കെതിരാണെന്നതുകൊണ്ടാണ് മെയ് 21ലെ ഉത്തരവ് റദ്ദാക്കിയതെന്നാണ് വിദ്യാഭ്യാസമന്ത്രി പറയുന്നത്. ഉത്തരവ് റദ്ദാക്കുന്നതിന് മുമ്പ് അധ്യാപകരുടെ പ്രതിനിധികളുമായി ചര്‍ച്ച നടത്തിയിരുന്നുവെന്നും അദ്ദേഹം വ്യക്തമാക്കി.

പ്രത്യേക ചട്ടങ്ങളനുസരിച്ച് പ്രിന്‍സിപ്പിലാവുന്നതിന് ഹയര്‍ സെക്കന്ററി അധ്യാപകര്‍ക്ക് 12 വര്‍ഷത്തെ സര്‍വീസ് വേണം.

അതേ സമയം നിക്ഷിപ്ത താത്പര്യങ്ങളാണ് ആദ്യത്തെ ഉത്തരവ് റദ്ദാക്കിയതിന് പിന്നിലാണെന്നാണ് ഒരു വിഭാഗം അധ്യാപക സംഘടനകള്‍ ആരോപിക്കുന്നത്. പ്രശ്നം കോടതിയ്ക്കു മുന്നിലെത്തിക്കാനാണ് അവരുടെ നീക്കം.

സര്‍ക്കാര്‍ ഉത്തരവില്‍ പ്രതിഷേധിച്ച് ഹയര്‍സെക്കന്ററി പരീക്ഷയുടെ മൂല്യനിര്‍ണയക്യാമ്പുകള്‍ ഒരു വിഭാഗം അധ്യാപകര്‍ മെയ് 27 തിങ്കളാഴ്ച ബഹിഷ്കരിച്ചിരുന്നു.