കെഎസ്ഇബിയെ സ്വകാര്യവല്ക്കരിക്കുന്നു : വിഎസ്

കൊച്ചി: എഡിബി നിര്‍ദേശമനുസരിച്ച് സര്‍ക്കാര്‍ വൈദ്യുതിബോര്‍ഡിനെ സ്വകാര്യവല്ക്കരിക്കാന്‍ ശ്രമിക്കുകയാണെന്ന് പ്രതിപക്ഷനേതാവ് വി.എസ്. അച്യുതാനന്ദന്‍.

എഡിബി വ്യവസ്ഥകളും കെഎസ്ഇബിയും എന്ന ഏകദിന സെമിനാര്‍ ജൂണ്‍ 10 തിങ്കളാഴ്ച ഉദ്ഘാടനം ചെയ്യുകയായിരുന്നു വിഎസ്. എഡിബി-ലോകബാങ്ക് വായ്പകളടുത്ത സംസ്ഥാനങ്ങളെല്ലാം അവരുടെ തലവേദന വര്‍ധിപ്പിച്ചിട്ടേയുള്ളൂ. സ്വകാര്യവല്ക്കരണം തൊഴിലാളികളുടെ താല്പര്യങ്ങളെ മാത്രമല്ല, സംസ്ഥാനത്തെയും ദോഷകരമായി ബാധിക്കുമെന്ന് വിഎസ് ചൂണ്ടിക്കാട്ടി.

ലോഡ് ഷെഡിംഗിലൂടെയും മറ്റും ഒരു വര്‍ഷത്തെ ഭരണത്തിനിടയില്‍ ഈ സര്‍ക്കാര്‍ ജനങ്ങളുടെ കഷ്ടപ്പാടുകള്‍ കൂട്ടിയിട്ടേയുള്ളൂ. ഒട്ടേറെ വ്യവസായങ്ങള്‍ അടച്ചുപൂട്ടലിന്റെ വക്കത്താണ്. വിവിധ വകുപ്പുകള്‍ക്ക് വൈദ്യുതിനല്കിയ വകയില്‍ കെഎസ്ഇബിയ്ക്ക് സര്‍ക്കാര്‍ 4600 കോടി രൂപ നല്കാനുണ്ട്. ഈ കടം മറച്ചുവച്ചുകൊണ്ടാണ് കെഎസ്ഇബി നഷ്ടത്തിലാണെന്ന് സര്‍ക്കാര്‍ പറഞ്ഞുകൊണ്ടിരിക്കുന്നത്.

ഇലക്ട്രിസിറ്റി എംപ്ലോയീസ് ഫെഡറേഷന്‍ ഓഫ് ഇന്ത്യ പ്രസിഡന്റ് ഇ. ബാലാനന്ദന്‍ മുഖ്യപ്രഭാഷണം നടത്തി. മുന്‍ മുഖ്യമന്ത്രിയും സിപിഐ നേതാവുമായ പി.കെ. വാസുദേവന്‍ നായരും സംസാരിച്ചു.