പോകുന്ന പോക്കില്‍ ഒരു സത്യപ്രതിജ്ഞ

ദില്ലി : രാഷ്ട്രപതി പദത്തില്‍ നിന്നും വിരമിക്കാന്‍ ഒരു മാസം മാത്രം അവശേഷിയ്ക്കെ വീണ്ടും ഒരു സത്യപ്രതിജ്ഞ ചൊല്ലിക്കൊടുക്കല്‍.

വിരമിക്കാന്‍ ഒരുമാസം അവശേഷിയ്ക്കെ സത്യപ്രതിജ്ഞ നടത്താന്‍ നിര്‍ബന്ധിതനാക്കപ്പെട്ട മറ്റൊരു രാഷ്ട്രപതിയുണ്ടെന്ന് തോന്നുന്നില്ല. കേന്ദ്രമന്ത്രിസഭയുടെ ഈ അഴിച്ചു പണിയും കെ. ആര്‍. നാരായണന് സമ്മാനിക്കുന്നത് അധികമാര്‍ക്കും കിട്ടാനിടയില്ലാത്ത ബഹുമതി തന്നെ.

കേന്ദ്രമന്ത്രിസഭയുടെ നെഞ്ചിലെ മുളളായിരുന്നു ഈ രാഷ്ട്രപതി. ലാലു ഭരണത്തിന്റെ ചിറകരിയാനുളള ഓര്‍ഡിനന്‍സില്‍ ഒപ്പിടാന്‍ വിസമ്മതം പ്രകടിപ്പിച്ച് ജനാധിപത്യത്തോടുളള തന്റെ പ്രതിബന്ധത തെളിയിക്കാന്‍ നാരായണന് രണ്ടാമതാലോചിക്കേണ്ടി വന്നില്ല. 356-ാം വകുപ്പു പ്രയോഗിക്കാനുളള ഓര്‍ഡനന്‍സുകള്‍ക്ക് ഭവ്യതയോടെ ഒപ്പു ചാര്‍ത്തിയ രാഷ്ട്രപതിമാര്‍ക്ക് ജന്മം നല്‍കിയ രാജ്യത്ത് ഇതൊരു അപൂര്‍വക്കാഴ്ചയാണ്.

ആഗോളീകരണത്തിന്റെ കയങ്ങളിലേയ്ക്ക് ഭരണാധികാരികള്‍ രാജ്യത്തെ കൈപിടിച്ചാനയിക്കുമ്പോള്‍ അരുത് എന്ന് തുറന്നു പറയാനും നാരായണന്‍ തയ്യാറായി. സ്വാതന്ത്യ്ര- റിപ്പബ്ലിക് ദിന സന്ദേശങ്ങളില്‍ സര്‍ക്കാരിനായി കരുതിവച്ചിരുന്ന മുനകള്‍ ആവോളമുണ്ടായിരുന്നു. ഒരു രാഷ്ട്രപതിയ്ക്ക് രാഷ്ട്രീയക്കാര്‍ വരച്ചിട്ട ലക്ഷ്മണ രേഖ മുറിച്ചു കടക്കാന്‍ ധൈര്യം കാണിച്ചെന്ന നിലയിലും നാരായണന്‍ ആദരവര്‍ഹിക്കുന്നു.