തര്‍ക്കം തുടരുന്നു, പ്രായവും പ്രശ്നം

തിരുവനന്തപുരം : യൂത്ത് കോണ്‍ഗ്രസ് പ്രസിഡന്റ് സ്ഥാനത്തെച്ചൊല്ലി ഐ ഗ്രൂപ്പും മൂന്നാം ഗ്രൂപ്പും തമ്മില്‍ പോര് മുറുകുന്നു.

പരമ്പരാഗതമായി യൂത്ത് കോണ്‍ഗ്രസ് പ്രസിഡന്റ് സ്ഥാനം തങ്ങളുടെ വകയാണെന്നാണ് കരുണാകരന്‍ ഗ്രൂപ്പിന്റെ വാദം. ഐ ഗ്രൂപ്പുകാരനെന്ന നിലയിലാണ് മുന്‍ പ്രസിഡന്റ് കെ. സി. വേണുഗോപാലിന് ആ സ്ഥാനം കിട്ടിയതെന്നും അതിനാല്‍ തുടര്‍ന്നും അത് ഗ്രൂപ്പിന് തന്നെ ലഭിക്കണമെന്നുമുളള കടുത്ത നിലപാടിലാണ് കരുണാകരന്‍. പുനസംഘടനാ ചര്‍ച്ചയില്‍ ഐ ഗ്രൂപ്പിനെ പ്രതിനിധീകരിച്ച വി. എസ്. ശിവകുമാര്‍ എം. പി., ഇ. എം. ആഗസ്തി എം. എല്‍. എ. എന്നിവര്‍ ശക്തമായിത്തന്നെ ഈ ആവശ്യം ഹൈക്കമാന്‍ഡിനെ അറിയിക്കുകയും ചെയ്തു.

എന്നാല്‍ പിരിച്ചു വിടപ്പെട്ട യൂത്ത് കോണ്‍ഗ്രസ് പ്രസിഡന്റ് തങ്ങളുടെ ഗ്രൂപ്പുകാരനായതിനാല്‍ ആ സ്ഥാനം തങ്ങള്‍ക്ക് കിട്ടണമെന്നാണ് മൂന്നാം ഗ്രൂപ്പിന്റെ ആവശ്യം. കരുണാകരന്റെ പിടിവാശിയ്ക്കു മുന്നില്‍ ഇക്കുറി കീഴടങ്ങില്ലെന്ന് മൂന്നാം ഗ്രൂപ്പ് നേതാവ് രമേശ് ചെന്നിത്തല പരസ്യമായി പ്രതികരിക്കുകയും ചെയ്തു.

യൂത്ത് കോണ്‍ഗ്രസ് പ്രസിഡന്റ് പദവിയില്‍ തങ്ങള്‍ക്ക് താല്‍പര്യമില്ലെന്ന് എ ഗ്രൂപ്പും നാലാം ഗ്രൂപ്പും വ്യക്തമാക്കിയിട്ടുണ്ട്. കെ. എസ്. യു. പ്രസിഡന്റ് സ്ഥാനത്തേയ്ക്കാണ് അവരുടെ നോട്ടം.

അതിനിടെ യൂത്ത് കോണ്‍ഗ്രസ്, കെ. എസ്. യു. നേതാക്കളുടെ പ്രായപരിധി സംബന്ധിച്ചുളള തര്‍ക്കവും രാഷ്ട്രീയ കേന്ദ്രങ്ങളില്‍ ചിരി പരത്തിയിട്ടുണ്ട്. ഈ സംഘടനകളുടെ നേതാക്കളുടെ പ്രായപരിധി 35 ആയിരിക്കണമെന്നാണ് ഹൈക്കമാന്‍ഡ് നിര്‍ദ്ദേശം. അതില്‍ ഒരു കാരണവശാലും ഇളവ് നല്‍കില്ലെന്നും കേന്ദ്ര നേതൃത്വം വ്യക്തമാക്കിയിട്ടുണ്ട്.

എന്നാല്‍ പ്രായപരിധി പറഞ്ഞ് ആരെയും ഒഴിവാക്കരുതെന്ന് കരുണാകരന്‍ ആവശ്യപ്പെടുന്നു. ഉമ്മന്‍ചാണ്ടിയും ഈ അഭിപ്രായക്കാരനാണ്. എന്നാല്‍ ഇളവ് ഏതുവരെ ആകാമെന്ന കാര്യത്തില്‍ ഇതുവരെ തീരുമാനമായിട്ടില്ല.

പ്രായപരിധി എന്ന നിര്‍ദ്ദേശത്തെ കെ. മുരളീധരനും എതിര്‍ക്കുന്നില്ല. ഇളവ് നല്‍കാന്‍ ഹൈക്കമാന്‍ഡ് തയ്യാറാകില്ലെന്നാണ് അദ്ദേഹം വെളിപ്പെടുത്തിയത്. ഏതായാലും തര്‍ക്കം എത്രയും വേഗം തീര്‍ത്ത് ജൂലായ് അവസാനത്തോടെ ഭാരവാഹികളെ തീരുമാനിക്കുമെന്ന് മുരളീധരന്‍ അറിയിച്ചു.