മോഹന്ലാലിന്റെ സ്ക്കൂള് ആഗസ്റ് 17ന്
തിരുവനന്തപുരം : സ്ക്കൂള് ഓഫ് ആഡിയോ എഞ്ചിനീയറിംഗ് ആഗസ്റ് 17ന് ഉദ്ഘാടനം ചെയ്യുമെന്ന് സൂപ്പര്താരം മോഹന്ലാല്.
ആസ്ട്രേലിയയിലെ പ്രസിദ്ധമായ സ്ക്കൂള് ഓഫ് ആഡിയോ എഞ്ചിനീയറിംഗിന്റെ ദക്ഷിണേന്ത്യയിലെ ശാഖയാണ് കഴക്കുട്ടത്ത് കിന്ഫ്രയില് സ്ഥാപിക്കുന്നത്. മോഹന്ലാലാണ് സ്ക്കൂളിന്റെ ഉടമ. നഗരത്തിലെ താല്ക്കാലിക കെട്ടിടത്തിലായിരിക്കും സ്ക്കൂള് പ്രവര്ത്തിക്കുന്നതെന്നും കിന്ഫ്രയിലെ കെട്ടിടം പൂര്ത്തിയായതിനു ശേഷം അവിടേയ്ക്ക് മാറ്റുമെന്നും മോഹന്ലാല് അറിയിച്ചു. ഏഴുമാസത്തിനകം കെട്ടിടം പണി പൂര്ത്തിയാകും.
കേരളത്തിലെ പ്രതിഭകള്ക്ക് അത്യാധുനികമായ സാങ്കേതിക വിദ്യയില് പരിശീലനം നല്കുന്നതിനാണ് സ്ക്കൂള് സ്ഥാപിക്കുന്നത്. ലോകനിലവാരമുളള സാങ്കേതിക വിദഗ്ദ്ധരെ മലയാളത്തില് നിന്നും സൃഷ്ടിക്കുക എന്നതാണ് സ്ക്കൂളിന്റെ ലക്ഷ്യമെന്ന് മോഹന്ലാല് വിശദീകരിക്കുന്നു.
മള്ട്ടി മീഡിയ, ശബ്ദ സന്നിവേശം, ഛായാഗ്രഹണം, ഡിജിറ്റല് ഫിലിം നിര്മ്മാണം എന്നിങ്ങനെയുളള ആധുനിക സിനിമാ സങ്കേതങ്ങളിലെല്ലാം സ്ക്കൂള് പരിശീലനം നല്കും. 2004ല് ഈ മേഖലയില് മൂന്നു ലക്ഷത്തോളം തൊഴില് അവസരങ്ങളുണ്ടാകുമെന്നാണ് അടുത്തിടെ നടന്ന ഒരു പഠനം വെളിപ്പെടുത്തിയത്.
വ്യവസായ മന്ത്രി പി. കെ. കുഞ്ഞാലിക്കുട്ടി, ഗതാഗത മന്ത്രി കെ. ബി. ഗണേഷ് കുമാര്, വിദ്യാഭ്യാസ മന്ത്രി നാലകത്തു സൂപ്പി എന്നിവരും ലാലിനോടൊപ്പം വാര്ത്താ സമ്മേളനത്തില് പങ്കെടുത്തു.