വ്യാജരേഖയ്ക്കു പിന്നില്‍ ശോഭനാ ജോര്‍ജ്?

തിരുവനന്തപുരം : ഹവാലക്കേസുമായി ബന്ധപ്പെട്ട് മന്ത്രി കെ. വി. തോമസിനെതിരെ വ്യാജരേഖ ചമച്ചതിനു പിന്നില്‍ ശോഭനാ ജോര്‍ജ്?

രേഖയുടെ ഉറവിടം സംബന്ധിച്ച് സൂര്യാ ടിവി റിപ്പോര്‍ട്ടര്‍ അനില്‍ നമ്പ്യാരെയും തനിനിറം സായാഹ്ന പത്രത്തിന്റെ ലേഖകനായ ജയചന്ദ്രനെയും ചോദ്യം ചെയ്ത പൊലീസ് അധികാരികള്‍ വിരല്‍ ചൂണ്ടുന്നത് ഐ ഗ്രൂപ്പ് നേതാവായ ശോഭനാ ജോര്‍ജിനെതിരെയാണ്. കേരളത്തിലെ കോണ്‍ഗ്രസ് രാഷ്ട്രീയത്തില്‍ ഏറെ കോളിളക്കം സൃഷ്ടിക്കുന്ന കണ്ടെത്തലാണ് ഇത്.

രേഖയുടെ ഉറവിടം സംബന്ധിച്ച് തനിനിറത്തിന്റെ ജയചന്ദ്രനെ ചോദ്യം ചെയ്തതും ശോഭനാ ജോര്‍ജിന് ഈ കേസില്‍ പങ്കുണ്ടെന്ന സംശയം ബലപ്പെടുത്തുന്നു. തനിനിറം സാഹാഹ്നപത്രത്തിന്റെ പ്രധാന ഓഹരിയുടമയാണ് ശോഭന ജോര്‍ജെന്നറിയുന്നു. വ്യജ രേഖ ചമച്ച് അത് പ്രസിദ്ധീകരിയ്ക്കാനായി ജയചന്ദ്രനെ ഉപയോഗിച്ചതായാണ് പോലീസ് കരുതുന്നത്.

ആഗസ്റ് ആറ് ചൊവാഴ്ച ക്രൈം ബ്രാഞ്ച് സൂര്യ ടി വി ലേഖകന്‍ അനില്‍ നമ്പ്യാരെ ചോദ്യം ചെയ്തിരുന്നു. ബുധനാഴ്ചയാണ് ചോദ്യം ചെയ്യാനായി ജയചന്ദ്രനെ കസ്റഡിയിലെടുത്തത്. അനില്‍ നമ്പ്യാരില്‍ നിന്ന് കിട്ടിയ വിവരങ്ങളുടെ അടിസ്ഥാനത്തിലാണ് ജയചന്ദ്രനെ ക്രൈം ബ്രാഞ്ച് കസ്റഡിയിലെടുത്തതെന്നാണ് കരുതുന്നത്.

ശോഭനാ ജോര്‍ജാണ് രേഖയുടെ പിന്നില്‍ എന്ന സംശയം ബലപ്പെട്ടതോടെ കോണ്‍ഗ്രസിനകത്ത് വീണ്ടും ഗ്രൂപ്പു യുദ്ധം രൂക്ഷമാകും. ഐ ഗ്രൂപ്പില്‍ തന്നെ ഇത് വന്‍ പൊട്ടിത്തെറിയ്ക്ക് വഴിവയ്ക്കുമെന്നാണ് സൂചന. സംസ്ഥാനത്തെ ഗ്രൂപ്പു രാഷ്ട്രീയത്തില്‍ ആടിക്കളിയ്ക്കുന്ന കെ. വി. തോമസിനെ ഒതുക്കാന്‍ ഐ ഗ്രൂപ്പ് മെനഞ്ഞെടുത്തതാണ് ഹവാല രേഖയെന്ന് അന്നു തന്നെ ആരോപണമുയര്‍ന്നിരുന്നു.

എന്നാല്‍ വ്യാജരേഖയുമായി യാതൊരു ബന്ധവുമില്ലെന്നും ഈ ആരോപണം രാഷ്ട്രീയ ഗൂഡാലോചനയുടെ ഫലമാണെന്നുമാണ് ശോഭനാ ജോര്‍ജുമായി ബന്ധപ്പെട്ട കേന്ദ്രങ്ങള്‍ പറയുന്നത്. ഏതായാലും വരുംദിനങ്ങളില്‍ കോണ്‍ഗ്രസ് രാഷ്ട്രീയം കലങ്ങി മറിയുമെന്നാണ് സൂചന.