കേബിള് വാടക കുത്തനെ കൂടും
കോഴിക്കോട്: പേ ചാനലുകള് നിരക്ക് കൂട്ടുകയും ചില പ്രധാന ചാനലുകള് പേ ചാനലുകളാക്കുകയും ചെയ്തതോടെ കേബിള് ടി വി ഓപ്പറേറ്റര്മാര് പ്രതിസന്ധിയിലായി.
പ്രതിമാസ വാടക കൂട്ടുകയല്ലാതെ നിവൃത്തിയില്ലെന്ന് കേബിള് ടിവി ഓപ്പറേറ്റര്മാര് പറയുന്നത്. നിരക്ക് കൂട്ടുന്നതോടെ കേബിള് ടിവി കാണല് ചെലവ് കൂടിയതാകും.
ചില പേ ചാനലുകള് കഴിഞ്ഞ ഒരു വര്ഷത്തിനുള്ളില് കുത്തനെയാണ് നിരക്ക് കൂട്ടിയത്. കേബിള് ചാനല് എത്തിക്കുന്നതിനുള്ള വൈദ്യുതി കാലിനുള്ള വാടക കൂട്ടാനുള്ള നീക്കത്തിലാണ് കെ എസ് ഇ ബി. ഇതിന് പുറമെ ലക്ഷ്വറി നികുതി ഏര്പ്പെടുത്താന് കേന്ദ്രസര്ക്കാരിന് നീക്കമുണ്ട്. അവസാനത്തെ ബജറ്റില് അഞ്ച് ശതമാനം സര്വീസ് നികുതി ഏര്പ്പെടുത്തിയതിന് പിന്നാലെയാണ് ഇത്.
ഇ എസ് പി എന്, സ്റാര് സ്പോര്ട്സ്, സീ, കാര്ട്ടൂണ് നെറ്റ്വര്ക്ക്, എച്ച്ബിഒ, സെറ്റ്മാക്സ്, സോണി എന്നീ പ്രമുഖ പേ ചാനലുകള് അമ്പത് ശതമാനം വരെയാണ് നിരക്ക് കൂട്ടിയത്. ടെന് സ്പോര്ട്സ് അടുത്തു തന്നെ നിരക്ക് കൂട്ടുമെന്നാണ് അറിയുന്നത്.
സണ് ടി വി ഗ്രൂപ്പ് അവരുടെ ചാനലുകള് പേ ചാനലാക്കാന് തീരുമാനിച്ചിട്ടുണ്ട്. 2003 ജനവരി മുതല് ഇവ പേ ചാനലുകളാവും.
പ്രതിസന്ധി അതിജീവിക്കാന് ചെറുകിട കേബിള് ഓപ്പറേറ്റര്മാര് വാടക കുത്തനെ കൂട്ടാനുള്ള നീക്കത്തിലാണ്.