ജപ്പാന്‍കിടക്ക: 11 പേര്‍ പിടിയില്‍

കൊച്ചി: രോഗങ്ങള്‍ ഭേദമാകുമെന്ന പ്രചാരണത്തോടെ വിറ്റഴിച്ച ജപ്പാന്‍ കിടക്കയ്ക്ക് വേണ്ടത്ര രോഗനിവാരണഗുണമില്ലെന്ന വിമര്‍ശനമുയര്‍ന്നതോടെ അധികൃതര്‍ അത്തരം കിടക്കകള്‍ വിറ്റഴിക്കുന്ന കമ്പനികള്‍ക്കെതിരെ നീക്കം തുടങ്ങി. ഇതിന്റെ ഭാഗമായി ജപ്പന്‍ കിടക്കയുടെ കൊച്ചിയിലെ പ്രധാനവില്പനക്കാരായ ജപ്പാന്‍ ലൈഫ് ഇന്ത്യയുടെ നാലു മാസ്റര്‍ ഡിസ്ട്രിബ്യൂട്ടര്‍മാര്‍ ഉള്‍പ്പെടെ 11 പേരെ ക്രൈംബ്രാഞ്ച് പിടികൂടി. ഇതില്‍ രണ്ടു പേര്‍ സ്ത്രീകളാണ്.

കൊച്ചിയിലെ ജപ്പാന്‍ ലൈഫ് ഇന്ത്യയുടെ ചുമതലയുള്ള ഉമേഷ് ഷെട്ടിയാണ് രണ്ടാം പ്രതി. നേവിയില്‍ നിന്ന് വിരമിച്ച പത്തനംതിട്ട സ്വദേശി പി.കെ. മത്തായിയാണ് നാലാംപ്രതി. മനോജ് കോഹ്ലി, പി.എം. മുബാറക്ക്, അഡിനാല്‍ മാഡ്രിസ്, മാലിനി ഹെയ്സാല്‍, കോഴിക്കോട്ടുകാരി ദീപിക, മാത്യു ജോണ്‍, ബിഎസ്എന്‍എല്‍ ഉദ്യോഗസ്ഥന്‍ സാബു, മുജീബ് റഹ്മാന്‍, ലാലു ജോസഫ് എന്നിവരാണ് മറ്റ് പ്രതികള്‍.

ഇവരില്‍ എല്ലാവരുടെയും വിശദവിവരങ്ങള്‍ ക്രൈംബ്രാഞ്ചിന് ലഭിച്ചിട്ടില്ല. ജപ്പാന്‍ കിടക്കയുടെ വില്പനക്കാരായ പലരും കുറഞ്ഞ കാലത്തിനുള്ളില്‍ ലക്ഷങ്ങള്‍ സമ്പാദിച്ചതായി പറയുന്നു. ഇതിനിടെ കാന്തികക്കിടക്കയില്‍ പണം നഷ്ടപ്പെട്ടവര്‍ കൊച്ചിയിലെ ജപ്പാന്‍ ലൈഫ് ഓഫീസിന് മുന്നില്‍ യോഗം ചേരുമെന്ന് തൃശൂര്‍ സ്വദേശി കൃഷ്ണകുമാര്‍ പറഞ്ഞു. രോഗങ്ങളും മാറ്റുന്ന അത്ഭുതസിദ്ധിയുണ്ടെന്ന് അവകാശപ്പെടുന്ന ജപ്പാന്‍ കാന്തികക്കിടക്ക 50,000 രൂപ മുതല്‍ ഒരു ലക്ഷം രൂപയ്ക്കാണ് വിറ്റഴിച്ചിരുന്നത്.