തെളിവുകളിലേക്ക് എത്തിച്ചത് ഫോണ്‍ കോള്‍

തിരുവനന്തപുരം: വ്യാജരേഖ ചമയ്ക്കുകയും അത് സൂര്യാ ടി വി ഓഫീസില്‍ എത്തിക്കുകയും ചെയ്തവരെ കണ്ടെത്താന്‍ ക്രൈംബ്രാഞ്ചിനെ സഹായിച്ചത് ഒരു ഫോണ്‍കോള്‍.

ഒരു ഡി വൈ എസ് പി ഫോണില്‍ വിളിച്ച് കേസിന്റെ വിശദാംശങ്ങള്‍ പറഞ്ഞിരുന്നു എന്ന സൂര്യാ ടിവി റിപ്പോര്‍ട്ടര്‍ അനില്‍ നമ്പ്യാരുടെ മൊഴിയാണ് അന്വേഷണത്തില്‍ വഴിത്തിരിവായത്. ഈ ഫോണ്‍ കോള്‍ കേന്ദ്രീകരിച്ച് നടത്തിയ അന്വേഷണത്തിലൂടെയാണ് ശോഭനാ ജോര്‍ജും അവരുടെ കൂട്ടാളികളുമാണ് വ്യാജരേഖയ്ക്ക് പിന്നിലെന്ന് വ്യക്തമായ തെളിവുകളോടെ കണ്ടെത്താന്‍ അന്വേഷണ സംഘത്തിന് കഴിഞ്ഞത്.

സൂര്യാ ടി വി ഓഫീസിലും അനില്‍ നമ്പ്യാരുടെ വീട്ടിലും ഫോണ്‍ കോളിന്റെ ഉറവിടം കണ്ടെത്തുക എന്ന ലക്ഷ്യത്തോടെ ക്രൈംബ്രാഞ്ച് പരിശോധന നടത്തി. കേരളത്തിലെ അഞ്ച് ലക്ഷത്തോളം മൊബൈല്‍ ഫോണ്‍ നമ്പരുകള്‍ ചില സാങ്കേതികവിദ്യകള്‍ ഉപയോഗിച്ച് പരിശോധിച്ചു. അന്വേഷണത്തിനൊടുവില്‍ സൂര്യാ ടിവി ഓഫീസിലേക്ക് വിളിച്ച നമ്പര്‍ കണ്ടെത്തി. ശോഭനാ ജോര്‍ജിനും അവരുടെ പി എ അനില്‍ പി. ശ്രീരംഗത്തിനും തനിനിറം ജയചന്ദ്രനും അടുത്ത ബന്ധമുള്ളതാണ് ഈ നമ്പര്‍.

സൂര്യാ ടി വിയില്‍ ജൂണ്‍ 24ന് വാര്‍ത്ത വരുന്നതിന് മുമ്പ് ശോഭനയും മറ്റും നടത്തിയ യാത്രയുടെ വിശദാംശങ്ങള്‍ സംബന്ധിച്ച് അനിലും ജയചന്ദ്രനും നല്‍കിയ മൊഴികളില്‍ വൈരുധ്യമുണ്ടായിരുന്നു.

സൂര്യാ ടി വി ഓഫീസില്‍ വ്യാജരേഖ എത്തിച്ചവരെ കുറിച്ചും അന്വേഷണ സംഘത്തിന് വിവരം ലഭിച്ചിട്ടുണ്ട്.