ചിലര്‍ പൊലീസ് നയം അട്ടിമറിക്കുന്നു: മുരളി

തിരുവനന്തപുരം: പൊലീസിലെ ചില ഉയര്‍ന്ന ഉദ്യോഗസ്ഥര്‍ സര്‍ക്കാരിന്റെ പൊലീസ് നയം അട്ടിമറിക്കാന്‍ ശ്രമിക്കുന്നുണ്ടെന്ന് കെപിസിസി പ്രസിഡന്റ് കെ. മുരളീധരന്‍. ഒക്ടോബര്‍ 24 വ്യാഴാഴ്ച തിരുവനന്തപുരത്ത് നടന്ന കോണ്‍ഗ്രസ് അച്ചടക്കസമിതിയോഗത്തിന് ശേഷം വാര്‍ത്താലേഖകരുമായി സംസാരിക്കുകയായിരുന്നു മുരളീധരന്‍.

പൊലീസ് നയം അട്ടിമറിക്കാന്‍ ചില ഉദ്യോഗസ്ഥര്‍ ശ്രമിക്കുന്നുവെന്ന ഉമ്മന്‍ചാണ്ടിയുടെ അഭിപ്രായത്തോട് തനിക്ക് യോജിപ്പാണുള്ളത്. അതേ സമയം ഇക്കാര്യത്തില്‍ യുഡിഎഫ് കണ്‍വീനറും മുഖ്യമന്ത്രിയും തമ്മില്‍ അഭിപ്രായഭിന്നതയുണ്ടെന്ന് തോന്നുന്നില്ല. - മുരളീധരന്‍ വ്യക്തമാക്കി.

പൊലീസുകാരുടെ സ്ഥലംമാറ്റത്തിന്റെയും നിയമനത്തിന്റെയും കാര്യത്തില്‍ മുഖ്യമന്ത്രി എടുത്ത നിലപാട് കൃത്യമാണ്. അതേ സമയം കോഴിക്കോട് ഡിസിസി പ്രസിഡന്റിനെ വരെ അറസ്റ് ചെയ്യാന്‍മടിയില്ലാത്ത പൊലീസ് ഉദ്യോഗസ്ഥരുമുണ്ട്. ഇക്കൂട്ടരാണ് പൊലീസ്നയം അട്ടിമറിക്കാന്‍ ശ്രമിക്കുന്നവര്‍. - മുരളീധരന്‍ പറഞ്ഞു.

അച്ചടക്കസമിതിയോഗം വ്യാഴാഴ്ച ശോഭനാ ജോര്‍ജ്ജ് എംഎല്‍എ അച്ചടക്കലംഘനത്തിന് നല്കിയ മറുപടി പരിശോധിച്ചു. ഇക്കാര്യത്തില്‍ കൂടുതല്‍ ചര്‍ച്ച ചെയ്ത ശേഷം തീരുമാനമെടുക്കും. - മുരളീധരന്‍ പറഞ്ഞു.