തൃശൂരില്‍ ഗുണ്ടാനേതാവിനെ വെട്ടിക്കൊന്നു

തൃശൂര്‍: ഗുണ്ടാസംഘത്തിന്റെ നേതാവ് ചാപ്ലി ബിജു എന്ന ചിയ്യാരം ആലുംവെട്ടുവഴികോപ്പാടന്‍ ബിജു (27) വിനെ നാടന്‍ ബോംബെറിഞ്ഞും വെട്ടിയും കൊലപ്പെടുത്തി.

നഗരത്തിലെ മറ്റൊരു ഗുണ്ടാ സംഘമാണ് കൊല നടത്തിയതെന്ന് സംശയിക്കുന്നു. തന്റെ സംഘത്തിന്റെ എതിരാളികളായ ഗുണ്ടാസംഘത്തിന്റെ തലവന്‍ ദുര്‍ഗാപ്രസാദിനെ രണ്ട് വര്‍ഷം മുമ്പ് വെട്ടിക്കൊന്ന കേസിലെ പ്രതിയാണ് ബിജു.

ഒക്ടോബര്‍ 26 ശനിയാഴ്ച രാവിലെ ആറരയോടെ ഒരു കാറിലെത്തിയ സംഘമാണ് ബിജുവിനെ വധിച്ചത്. ബിജുവിന്റെ മൊബൈല്‍ ഫോണില്‍ വിളിച്ച് ചിയ്യാരത്തെ വീട്ടില്‍ നിന്ന് പുറത്തേക്ക് വരുത്തിയാണ് കൊല ചെയ്തത്.

ചിയ്യാരം പോസ്റോഫീസിന് അരികിലെത്തിയപ്പോള്‍ സംശയം തോന്നിയ ബിജു മൊബൈലില്‍ വിളിച്ച് കൂട്ടാളികളുമായി ബന്ധപ്പെടാന്‍ ശ്രമിച്ചു. കാറിലുണ്ടായിരുന്നവര്‍ നാടന്‍ ബോംബെറിഞ്ഞ് ഭീകരാന്തരീക്ഷം സൃഷ്ടിക്കുകയും പിന്നീട് വെട്ടുകയുമായിരുന്നു.

ഗുരുതരമായ പരിക്കുകളോടെ റോഡില്‍ കിടന്ന ബിജുവിനെ നാട്ടുകാര്‍ ഓട്ടോറിക്ഷയില്‍ കയറ്റി ആശുപത്രിയിലെത്തിച്ചെങ്കിലും ജീവന്‍ രക്ഷപ്പെടുത്താനായില്ല. ബിജുവിനെ വെട്ടിയവരില്‍ മൂന്ന് പേര്‍ കാറിലും മറ്റ് രണ്ടു പേര്‍ ബസിലും കയറിപോയതായി നാട്ടുകാര്‍ പറഞ്ഞു. സംഭവസ്ഥലത്തു നിന്ന് ഒരു മൊബൈല്‍ ഫോണും രണ്ട് വാളുകളും കണ്ടെടുത്തു.