ബുഷ് വീണ്ടും

വാഷിംഗ്ടണ്‍: യുഎസ് പ്രസിഡന്റ് തിരഞ്ഞെടുപ്പില്‍ ബുഷ് വിജയം ഉറപ്പാക്കി. ഡെമോക്രാറ്റിക് സ്ഥാനാര്‍ഥി ജോണ്‍ കെറി പരാജയം സമ്മതിച്ചതോടെയാണ് ജോര്‍ജ് ബുഷ് അമേരിക്കന്‍ പ്രസിഡന്റ് സ്ഥാനത്ത് രണ്ടാം വട്ടവും എത്തുമെന്ന് ഉറപ്പായത്.

തര്‍ക്ക സംസ്ഥാനമായ ഒഹായോവിലും ന്യൂ മെക്സിക്കോ, അയോവ എന്നീ സംസ്ഥാനങ്ങളിലെയും ഫലങ്ങള്‍ ബാക്കിയിരിക്കെ തന്നെയാണ് ജോണ്‍ കെറി പരാജയം സമ്മതിച്ചത്. ജനവരി അഞ്ചിനാണ് ബുഷ് വീണ്ടും ചുമതലയേല്‍ക്കുന്നത്.

ബുഷിന് ജനകീയവോട്ടില്‍ 37 ലക്ഷത്തിന്റെ ലീഡുള്ള സാഹചര്യത്തിലാണ് കെറി പരാജയം സമ്മതിച്ചത്. 20 ഇലക്ടറല്‍ ഒഹായോയിലെ ഫലം അവ്യക്തതയിലായപ്പോഴാണ് കെറി പരാജയം സമ്മതിച്ചത്. കെറി ബുഷിനെ ഫോണില്‍ വിളിച്ച് പരാജയം സമ്മതിക്കുകയായിരുന്നു.

ആകെയുള്ള 50 സംസ്ഥാനങ്ങളില്‍ 28 എണ്ണം ബുഷിനെ അനുകൂലിച്ചു. 254 ഇലക്ടറല്‍ വോട്ടുകളാണ് ബുഷിന് ലഭിച്ചത്. കെറിക്ക് 252ഉം. വിജയത്തിന് 270 ഇലക്ടറല്‍ വോട്ടാണ് വേണ്ടത്. വോട്ടെണ്ണല്‍ പുരോഗമിക്കുന്ന മൂന്ന് സംസ്ഥാനങ്ങളിലും ബുഷിനാണ് മേധാവിത്തം.

വോട്ടെണ്ണല്‍ പൂര്‍ത്തിയായി ഔദ്യോഗിക പ്രഖ്യാപനം വരാന്‍ ഇനിയും ദിവസങ്ങളെടുക്കും. ബുഷ് വിജയിച്ചതായി വൈറ്റ് ഹൗസും അവകാശപ്പെട്ടു.