അബുസലിമിന്റെ പാസ്പോര്ട്ട് റദ്ദാക്കി
ദില്ലി: അധോലോക നായകനും 1993ലെ മുംബൈ സ്ഫോടനപരമ്പരയ്ക്ക് പിന്നിലെ മുഖ്യപ്രതിയുമായ അബുസലിമിന്റെ പാസ്പോര്ട്ട് കേന്ദ്രസര്ക്കാര് റദ്ദാക്കി. അബുസലിമിനോടൊപ്പം പോര്ച്ചുഗലില് പിടിയിലായ ബോളിവുഡ് നടി മോണിക്ക ബേദിയുടെ പാസ്പോര്ട്ടും റദ്ദാക്കിയിട്ടുണ്ട്.
വിദേശകാര്യ മന്ത്രി യശ്വന്ത് സിന്ഹ നവമ്പര് 20 ബുധനാഴ്ച ലോക്സഭയില് അറിയിച്ചതാണ് ഇക്കാര്യം. ലഖ്നോ, ഭോപ്പാല്, ഹൈദരാബാദ് എന്നിവിടങ്ങളില് നിന്ന് അബു സലിമിന് പാസ്പോര്ട്ടുകള് ലഭിച്ചത്. ഭോപ്പാല്, ഹൈദരാബാദ്, മുംബൈ എന്നിവിടങ്ങളില് നിന്ന് നല്കിയ മൂന്ന് പാസ്പോര്ട്ടുകള് മോണിക്കാ ബേദിയ്ക്ക് സ്വന്തമായുണ്ടായിരുന്നു.
1999ല് മോണിക്ക ബേദിക്ക് നല്കിയ പാസ്പോര്ട്ട് ഒഴികെ മറ്റെല്ലാ പാസ്പോര്ട്ടുകളും യാത്രാരേഖകളും വ്യാജപേരിലായിരുന്നു. വ്യാജപാസ്പോര്ട്ടുകള് നല്കിയ ലഖ്നോയിലെ പാസ്പോര്ട്ട് ഓഫീസിനെതിരെ സിബിഐ നല്കിയ കേസ് അന്വേഷിച്ചുവരികയാണ്. വ്യാജ പാസ്പോര്ട്ടുകള് നല്കിയ മറ്റ് പാസ്പോര്ട്ട് ഓഫീസുകളെപ്പറ്റിയും അന്വേഷിക്കും.- മന്ത്രി യശ്വന്ത് സിന്ഹ പറഞ്ഞു.