പിള്ള വിശദീകരണം നല്കി

അരുവിക്കര: വിവാദപ്രസംഗത്തെക്കുറിച്ച് അരുവിക്കരയില്‍ നടന്ന യുഡിഎഫ് ഉന്നതാധികാരസമിതി യോഗത്തില്‍ കേരള കോണ്‍ഗ്രസ്(ബി) നേതാവ് ബാലകൃഷ്ണപിള്ള വിശദീകരണം നല്കി. തന്റെ വിശദീകരണം യോഗത്തിന് ബോധ്യപ്പെട്ടതായി ബാലകൃഷ്ണപിള്ള പിന്നീട് വാര്‍ത്താലേഖകരെ അറിയിച്ചു.

കൊച്ചിയില്‍ സ്വകാര്യാശുപത്രിയില്‍ ചികിത്സയില്‍ കഴിയുന്ന ഭാര്യയുടെ അടുത്ത് നിന്നാണ് ബാലകൃഷ്ണപിള്ള യോഗത്തില്‍ പങ്കെടുക്കാന്‍ നേരെ അരുവിക്കരയിലേക്ക് പോയത്. ഒരിടവേളയ്ക്ക് ശേഷമാണ് പിള്ള യുഡിഎഫ് യോഗത്തില്‍ പങ്കെടുത്തത്.

തന്റെ പ്രസംഗത്തിന്റെ വിവാദഭാഗം ഏതെന്ന് വിശദീകരിക്കാന്‍ ആവശ്യപ്പെട്ടുകൊണ്ടാണ് പിള്ള പ്രസംഗം തുടങ്ങിയത്. തുടര്‍ന്ന് പിള്ള തന്റെ പ്രസംഗത്തില്‍ വിവാദമായി യാതൊന്നുമില്ലെന്നും വിശദീകരിച്ചു. പാര്‍ട്ടിയുടെ വലിപ്പച്ചെറുപ്പത്തെ അടിസ്ഥാനപ്പെടുത്തിയുള്ള വിവേചനം ശരിയല്ലെന്നും പിള്ള യോഗത്തിന് താക്കീത് നല്കി.

പ്രസംഗത്തിന് വിശദീകരണം നല്കുകയല്ല, തന്നെ യോഗത്തില്‍ പങ്കെടുപ്പിക്കാന്‍ വേണ്ടിയാണ് തന്റെ പ്രസംഗം ചിലര്‍ വിവാദമാക്കിയതെന്നും യോഗത്തിന് ശേഷം പുറത്തുവന്ന പിള്ള പറഞ്ഞു.യോഗത്തില്‍ പങ്കെടുത്ത് അല്പസമയം കഴിഞ്ഞപ്പോള്‍ ബാലകൃഷ്ണപിള്ളയും കെ. കരുണാകരനും ഇറങ്ങിപ്പോയി.