സോണിയ രാഷ്ട്രീയം ചര്‍ച്ച ചെയ്തില്ല

തിരുവനന്തപുരം: മൗറീഷ്യസിലേക്കുള്ള യാത്രാമധ്യേ തിരുവനന്തപുരം വിമാനത്താവളത്തില്‍ ഒരു മണിക്കൂറോളം ചെലവിട്ട സോണിയാഗാന്ധി കോണ്‍ഗ്രസ് നേതാക്കളുമായി കുഞ്ഞാലിക്കുട്ടി പ്രശ്നം ഉള്‍പ്പെടെയുള്ള രാഷ്ട്രീയപ്രശ്നങ്ങള്‍ ചര്‍ച്ച ചെയ്തില്ല.

മുന്‍മുഖ്യമന്ത്രി എ.കെ. ആന്റണി, കെപിസിസി പ്രസിഡന്റ് തെന്നല ബാലകൃഷ്ണപിള്ള, കെപിസിസി വൈസ് പ്രസിഡന്റ് എ. സി ജോസ്, യുഡിഎഫ് കണ്‍വീനര്‍ പി. പി. തങ്കച്ചന്‍ തുടങ്ങിയ നേതാക്കള്‍ വിമാനത്താവളത്തില്‍ സോണിയയെ സ്വീകരിക്കാന്‍ എത്തിയിരുന്നു. കേരളത്തിലെ രാഷ്ട്രീയപ്രശ്നങ്ങള്‍ സോണിയാഗാന്ധിയെ നേതാക്കന്മാര്‍ ധരിപ്പിക്കുമെന്നു കരുതിയിരുന്നെങ്കിലും വിമാനത്താവളത്തിലെ വിവിഐപി ലോഞ്ചില്‍ വച്ച് അവര്‍ എല്ലാ നേതാക്കന്മരേയും ഒരുമിച്ചു കാണുകയായിരുന്നു.

ഉച്ചക്ക് ഒന്നേകാലോടെ പ്രത്യേകവിമാനത്തില്‍ വന്നിറങ്ങിയ സോണിയയോടൊപ്പം എഐസിസി ജനറല്‍ സെക്രട്ടറി അംബികാസോണിയുമുണ്ടായിരുന്നു.

രണ്ടേകാലോടെ സോണിയയെ യാത്രയാക്കിയതിന് ശേഷം പുറത്തുവന്ന എ. കെ. ആന്റണി മാധ്യമപ്രവര്‍ത്തകരോടു സംസാരിക്കാന്‍ വിസമ്മതിച്ചു. തെന്നല ബാലകൃഷ്ണപിള്ളയാണ് സോണിയയുമായുള്ള കൂടിക്കാഴ്ചയുടെ വിശദവിവരങ്ങള്‍ വെളിപ്പെടുത്തിയത്.