ചെര്ക്കളം തിലകമണിഞ്ഞത് വിവാദമാവുന്നു
മലപ്പുറം: മഞ്ചേശ്വരത്ത് ശൃംഗേരി മഠാധിപതിയെ സന്ദര്ശിച്ച മന്ത്രി ചെര്ക്കളം അബ്ദുള്ള നെറ്റിയില് തിലകം ചാര്ത്തിയത് അനിസ്ലാമികമാണെന്ന് സുന്നി യുവജന സംഘം ( എസ് വൈ എസ്) ആരോപിച്ചു.
ഇസ്ലാം മതാചാരങ്ങള് ലംഘിച്ച് മറ്റൊരു മതത്തിന്റെ ആചാരങ്ങള് സ്വീകരിച്ച മന്ത്രിയെ പള്ളികളില് പ്രവേശിക്കുന്നതില് നിന്നും വിശ്വാസികള് തടയണമെന്ന് എസ് വൈ എസ് സംസ്ഥാന കമ്മിറ്റി ആവശ്യപ്പെട്ടു.
അതേ സമയം താന് സ്വയം തിലകം ചാര്ത്തിയിട്ടില്ലെന്നും അതുകൊണ്ടുതന്നെ ഈ ആരോപണത്തോട് പ്രതികരിക്കേണ്ടതില്ലെന്നും ചെര്ക്കളം അബ്ദുള്ള പറഞ്ഞു.
തിലകവിവാദത്തെ കുറിച്ച് ജനവരി മൂന്ന് വെള്ളിയാഴ്ച മുസ്ലിം ലീഗ് സംസ്ഥാന പ്രസിഡന്റ് പാണക്കാട് സയിദ് മുഹമ്മദലി ശിഹാബ് തങ്ങളുമായി ചര്ച്ച നടത്തും. ഇതിനായി അദ്ദേഹം പാണക്കാടേക്ക് തിരിച്ചിട്ടുണ്ട്.
പ്രായശ്ചിത്തം ചെയ്യാതെ ചെര്ക്കളം പള്ളിയില് പ്രവേശിക്കരുതെന്ന എസ് ഐ എസിന്റെ പ്രസ്താവനയോട് പ്രതികരിച്ചുകൊണ്ട് താന് വെള്ളിയാഴ്ച പള്ളിയില് പ്രാര്ഥന നടത്തുമെന്ന് മന്ത്രി പറഞ്ഞിരുന്നു. എന്നാല് വെള്ളിയാഴ്ച പള്ളിയില് പോവാതെ അദ്ദേഹം കണ്ണൂരില് നിന്നും പാണക്കാട്ടേക്ക് തിരിക്കുകയായിരുന്നു.
ഇസ്ലാമിക തത്വങ്ങള് ലംഘിച്ച ചെര്ക്കളം അബ്ദുള്ളയോട് യാതൊരു വിട്ടുവീഴ്ചയും ചെയ്യില്ലെന്ന് എസ് ഐ എസ് സംസ്ഥാന പ്രസിഡന്റ് പാണക്കാട് സയിദ് ഒമര് അലി ശിഹാബ് തങ്ങള് പറഞ്ഞു. മുസ്ലിം ലീഗ് സംസ്ഥാന പ്രസിഡന്റ് പാണക്കാട് സയിദ് മുഹമ്മദലി ശിഹാബ് തങ്ങളുടെ സഹോദരനാണ് ഒമര് അലി.
സമസ്ത കേരള ജമായത്തുല് ഉലെമ സെക്രട്ടറി കാന്തപുരം എം. പി. അബൂബക്കറും മന്ത്രി തിലകം ചാര്ത്തിയതിനോട് വിയോജിപ്പ് പ്രകടിപ്പിച്ചു.
മുഖ്യമന്ത്രി എ. കെ. ആന്റണിയോടൊപ്പമാണ് ചെര്ക്കളം ശൃംഗേരി മഠം സന്ദര്ശിച്ചത്. ശൃംഗേരി ശങ്കരാചാര്യരുടെ ഇരിപ്പിടത്തിന് താഴെയായി മുഖ്യമന്ത്രി തറയിലിരുന്നതിനെ സി പി എം സംസ്ഥാന സെക്രട്ടറി സി പി എം പിണറായി വിജയന് വിമര്ശിച്ചിരുന്നു. മഠത്തിലെ പുരോഹിതരാണ് മുഖ്യമന്ത്രിയുടെയും മന്ത്രിയുടെയും നെറ്റിയില് തിലകം ചാര്ത്തിയത്.