തെഹല്‍ക്ക: ഫുകാന്‍ അന്വേഷിയ്ക്കും

ദില്ലി: തെഹല്‍ക്ക ആയുധ ഇടപാട് വെളിപ്പെടുത്തലിനെക്കുറിച്ച് അന്വേഷിയ്ക്കാനായി സര്‍ക്കാര്‍ പുതിയ കമ്മിഷനെ നിയമിച്ചു. സുപ്രീം കോടതി റിട്ടയേഡ് ജഡ്ജി എസ്. എന്‍. ഫുകാന്‍ ആണ് പുതിയ കമ്മിഷന്‍.

അസംകാരനായ ഫുകാന്‍ കഴിഞ്ഞ വര്‍ഷമാണ് സുപ്രീം കോടതിയില്‍ നിന്ന് വിരമിച്ചത്. ജസ്റിസ് കെ. വെങ്കിടസ്വാമിയ്ക്ക് പകരമാണ് ഫുകാനെ നിയമിയ്ക്കുന്നത്. കെ. വെങ്കിടസ്വാമിയെ കസ്റംസ് എക്സൈസ് സംബന്ധിച്ച മറ്റൊരു കമ്മിഷനില്‍ കൂടി നിയമിച്ചത് വിവാദമായതിനെ തുടര്‍ന്ന് ഇരു സ്ഥാനങ്ങളില്‍ നിന്നും അദ്ദേഹം രാജി വച്ചു. ഇതിനെ തുടര്‍ന്നാണ് തെഹല്‍ക്കാ കമ്മിഷന്‍ ഇല്ലാതായത്.

കഴിഞ്ഞ രണ്ട് മാസമായി സര്‍ക്കാര്‍ തെഹല്‍ക്ക കമ്മിഷനായി പ്രവര്‍ത്തിയ്ക്കാന്‍ ഒരു ജഡ്ജിയെ അന്വേഷിയ്ക്കുകയായിരുന്നു.

ഇന്ത്യന്‍ സൈന്യത്തിനായി ആയുധം വാങ്ങിയവകയില്‍ രാഷ്ട്രീയ നേതാക്കളും സൈനിക ഉദ്വേഗസ്ഥരും കോഴവാങ്ങിയെന്നായിരുന്ന തെഹല്‍ക്ക ഡോട്ട് കോമിന്റെ കണ്ടെത്തല്‍. കൂടുതല്‍ അന്വേഷണ പത്രപ്രവര്‍ത്തനങ്ങല്‍ നടത്തിയെങ്കിലും പ്രവര്‍ത്തനത്തിന് പണമില്ലാതെ തെഹല്‍ക്ക രണ്ട് മാസം മുമ്പ് പൂട്ടി.