ഫിബ്രവരി ഒന്നിന് മലബാര് മഹാസംഗമം
കണ്ണൂര്: ഫിബ്രവരി ഒന്നിന് നടക്കുന്ന മലബാര് മഹാസംഗമത്തിനുള്ള ഒരുക്കങ്ങള് പുരോഗമിക്കുന്നു. മലബാറിലെ തീയ്യ സമുദായത്തില് പെട്ടവരെ സ്വാധീനിക്കുന്നതിനുള്ള പുതിയ തന്ത്രങ്ങള് മെനയുകയാണ് എസ് എന് ഡി പി.
മലബാര് മഹോത്സവവുമായി ബന്ധപ്പെട്ട് പ്രസിദ്ധീകരിച്ച ലഘുലേഖയില് സി പി എമ്മിനെ കടന്നാക്രമിക്കുന്നുണ്ട്. രക്തസാക്ഷികളുടെ എണ്ണം പെരുപ്പിക്കാനുള്ള കീഴ്വിഭാഗം മാത്രമായാണ് സി പി എം തീയ്യരെ കാണുന്നതെന്ന് ലഘുലേഖയില് ആരോപിക്കുന്നു.
സി പി എമ്മിലെ തീയ്യസമുദായത്തില് പെട്ടവരെ സ്വാധീനിക്കുകയെന്ന ലക്ഷ്യത്തോടെയാണ് മലബാര് മഹോത്സവവുമായി ബന്ധപ്പെട്ട പ്രചാരണങ്ങള് നടക്കുന്നത്. കണ്ണൂര് ജില്ലയിലെ അക്രമരാഷ്ട്രീയവുമായി ബന്ധപ്പെട്ട് കൊല ചെയ്യപ്പെട്ട സി പി എം പ്രവര്ത്തകരില് 95 ശതമാനവും തീയരാണെന്നാണ് എസ് എന് ഡി പിയുടെ ആരോപണം. സി പി എം കോട്ടകളില് സ്വാധീനമുറപ്പിക്കുക എന്നത് മാത്രം ലാക്കാക്കിയാണ് ഈ പ്രചാരണം.
തീയ്യരുടെ വിദ്യാഭ്യാസപരവും സാമൂഹികവുമായ പിന്നോക്കാവസ്ഥ ചൂഷണം ചെയ്ത് അവരെ അക്രമങ്ങളിലേക്ക് തള്ളിവിടുകയാണ് സി പി എം ചെയ്യുന്നതെന്ന് എസ് എന് ഡി പി യോഗം ജനറല് സെക്രട്ടറി വെള്ളാപ്പള്ളി നടേശന് ആരോപിക്കുന്നു.
അതേ സമയം എസ് എന് ഡി പിയുടെ ഇത്തരം പ്രചാരണങ്ങളൊന്നും തങ്ങളെ ഒരു തരത്തിലും ബാധിക്കില്ലെന്ന ആത്മവിശ്വാസത്തിലാണ് സി പി എം നേതൃത്വം. മലബാര് സംഗമത്തില് സി പി എമ്മുമായി ബന്ധപ്പെട്ട ആരും പങ്കെടുക്കില്ലെന്ന് സി പി എം കണ്ണൂര് ജില്ലാ സെക്രട്ടറി എം. വി. ഗോവിന്ദന് എം എല് എ പറഞ്ഞു.