നിക്ഷേപം ആകര്‍ഷിക്കാന്‍ നിയമഭേദഗതി

കൊച്ചി: സംസ്ഥാനത്ത് നിക്ഷേപങ്ങള്‍ ആകര്‍ഷിക്കുന്നതിന് നിയമത്തില്‍ മാറ്റം കൊണ്ടുവരുമെന്ന് വ്യവസായമന്ത്രി പി. കെ. കുഞ്ഞാലിക്കുട്ടി പറഞ്ഞു.

ആഗോള നിക്ഷേപക സമ്മേളനത്തിന് മുന്നോടിയായി നടന്ന നിക്ഷേപകരുടെ യോഗത്തില്‍ സംസാരിക്കുകയായിരുന്നു മന്ത്രി.

കേരളത്തില്‍ പുതിയ വ്യവസായങ്ങള്‍ സ്ഥാപിക്കുന്നതിനും നിലവിലുള്ളവ സംരക്ഷിക്കുന്നതിനുമുള്ള തടസങ്ങള്‍ നീക്കുന്നതിനുമാണ് നിയമഭേദഗതി കൊണ്ടുവരുന്നത്.

കുടിവെള്ളം, വൈദ്യുതി തുടങ്ങിയ മേഖലകളിലെ വികസനം ലക്ഷ്യമിടുന്ന പദ്ധതികള്‍ക്കാണ് ആഗോള നിക്ഷേപക സമ്മേളനത്തില്‍ മുന്‍ഗണന നല്‍കുക.

ആഗോള നിക്ഷേപക സമ്മേളനത്തില്‍ അനുമതി ലഭിക്കുന്ന ഏത് പദ്ധതിയ്ക്കും അന്തിമ അംഗീകാരം നല്‍കേണ്ടത് മന്ത്രിസഭയാണ്. മന്ത്രിസഭയുടെ പരിഗണനയില്‍ വരുംമുമ്പ് പദ്ധതികളുടെ വിവിധ വശങ്ങള്‍ പരിശോധിക്കും. എല്ലാ പദ്ധതി നിര്‍ദേശങ്ങളും സുതാര്യായിരിക്കും.

കേരളത്തെ നിക്ഷേപ സൗഹൃദ സംസ്ഥാനമാക്കി മാറ്റുക എന്നതാണ് നിക്ഷേപക സമ്മേളനത്തിന്റെ പ്രധാനലക്ഷ്യമെന്ന് മന്ത്രി പറഞ്ഞു.