മുസ്തഫയ്ക്കെതിരെ നടപടിയുണ്ടായേക്കും
തിരുവനന്തപുരം: കാര്ഷിക സര്വകലാശാല നിര്വാഹക സമിതിയിലേക്കുള്ള തിരഞ്ഞെടുപ്പില് നിന്ന് പിന്മാറിയില്ലെങ്കില് ടി. എച്ച്. മുസ്തഫ എം എല് എയ്ക്കെതിരെ കെ പി സി സി നേതൃത്വം അച്ചടക്ക നടപടി സ്വീകരിക്കും.
തിരഞ്ഞെടുപ്പില് നിന്ന് പിന്മാറണമെന്ന് ആവശ്യപ്പെട്ട് കെ പി സി സി പ്രസിഡന്റ് കെ. മുരളീധരന് ടെലിഗ്രാം അയച്ചിട്ടും പത്രിക പിന്വലിക്കാന് മുസ്തഫ തയ്യാറായില്ല. പത്രിക പിന്വലിക്കാനുള്ള അവസാന തീയതി കഴിഞ്ഞെങ്കിലും താന് തിരഞ്ഞെടുപ്പില് നിന്ന് പിന്മാറുകയാണെന്ന് വ്യക്തമാക്കി പ്രസ്താവനയിറക്കാനാണ് കെ പി സി സി നേതൃത്വം ആവശ്യപ്പെടുന്നത്. മുസ്തഫ ഇതിന് തയ്യാറായില്ലെങ്കില് നടപടിയുണ്ടാവും.
നേരത്തെ കെ. കരുണാകരനെതിരെ പരസ്യ വിമര്ശനം നടത്തിയതിന് മുസ്തഫയ്ക്ക് കാരണം കാണിക്കല് നോട്ടീസ് നല്കിയിരുന്നു. നോട്ടീസിനുള്ള മറുപടിയില് വിമര്ശനത്തില് ഖേദം പ്രകടിപ്പിക്കാന് മുസ്തഫ തയ്യാറായില്ല. പാര്ട്ടി ഭരണഘടനയ്ക്ക് വിരുദ്ധമായി താനൊന്നും ചെയ്തിട്ടില്ലെന്നാണ് മുസ്തഫയുടെ നിലപാട്.
അതേ സമയം കാരണം കാണിക്കല് നോട്ടീസ് ലഭിച്ച രാമചന്ദ്രന് മാസ്റര് മറുപടിയില് ഖേദം പ്രകടിപ്പിച്ചിരുന്നു.