മുസ്തഫ ജനറല്‍ കൗണ്‍സില്‍ അംഗത്വം രാജിവെച്ചു

കൊച്ചി: കാര്‍ഷിക സര്‍വകലാശാല നിര്‍വാഹക സമിതിയിലേക്കുള്ള തിരഞ്ഞെടുപ്പില്‍ നിന്ന് പിന്മാറണമെന്ന് കെ പി സി സി പ്രസിഡന്റ് ആവശ്യപ്പെട്ടതിനെ തുടര്‍ന്ന് സര്‍വകലാശാല ജനറല്‍ കൗണ്‍സിലില്‍ നിന്ന് ടി. എച്ച്. മുസ്തഫ എം എല്‍ എ രാജിവെച്ചു.

നിയമസഭാംഗങ്ങളുടെ പ്രതിനിധിയെന്ന നിലയ്ക്ക് ജനറല്‍ കൗണ്‍സില്‍ അംഗമായതു കൊണ്ട് മുഖ്യമന്ത്രിക്കാണ് താന്‍ രാജിക്കത്ത് നല്‍കുന്നതെന്ന് മുസ്തഫ അറിയിച്ചു.

തിരഞ്ഞെടുപ്പില്‍ കെ പി സി സി പ്രസിഡന്റ് കെ. മുരളീധരന്‍ ഇടപെട്ടതാണ് അംഗത്വം രാജിവെക്കുന്നതിനുള്ള കാരണമെന്ന് മുസ്തഫ പറഞ്ഞു.

സര്‍വകലാശാല തിരഞ്ഞെടുപ്പില്‍ കെ പി സി സി പ്രസിഡന്റിന് ഇടപെടാന്‍ അധികാരമില്ല. കെ പി സി സി പ്രസിഡന്റ് ഇടപെടുകയും നാമനിര്‍ദേശ പത്രിക പിന്‍വലിക്കാന്‍ ആവശ്യപ്പൈടുകയും ചെയ്തു. ജനറല്‍ കൗണ്‍സിലിലെ കോണ്‍ഗ്രസ് എം എല്‍ എമാരായ തനിക്കും പി. പി. ജോര്‍ജിനുമാണ് നിര്‍വാഹക സമിതി അംഗങ്ങളാവാന്‍ യോഗ്യതയെന്ന് മുസ്തഫ പറഞ്ഞു.