സ്വകാര്യ വൈദ്യുത പദ്ധതി: വ്യവസ്ഥകളില്‍ ഇളവ്

തിരുവനന്തപുരം: സ്വകാര്യ ചെറുകിട വൈദ്യുത പദ്ധതികള്‍ തുടങ്ങുന്നതിനുള്ള വ്യവസ്ഥകളില്‍ ഇളവ് വരുത്തിയെന്ന് വൈദ്യുതിമന്ത്രി കടവൂര്‍ ശിവദാസന്‍ അറിയിച്ചു.

ചെറുകിട വൈദ്യുതി പദ്ധതികള്‍ക്ക് നിക്ഷേപം നടത്തുന്നവര്‍ വെള്ളത്തിനുള്ള സെസ് അടക്കേണ്ടതില്ല. ഉത്പാദിപ്പിക്കുന്ന മൊത്തം വൈദ്യുതിയും ഉപയോഗിക്കുകയും ചെയ്യാം.

സെസ് നല്‍കണമെന്നും ഉത്പാദിപ്പിക്കുന്ന വൈദ്യുതിയുടെ 25 ശതമാനം വൈദ്യുതി ബോര്‍ഡിന് കൈമാറണമെന്നും നേരത്തെ വ്യവസ്ഥകളുണ്ടായിരുന്നതുകൊണ്ട് സ്വകാര്യ ചെറുകിട വൈദ്യുത പദ്ധതികള്‍ ഏറ്റെടുക്കാന്‍ ആരും മുന്നോട്ടുവന്നില്ലെന്ന് കടവൂര്‍ പറഞ്ഞു. ഈ സാഹചര്യത്തിലാണ് വ്യവസ്ഥകളില്‍ അയവ് വരുത്തുന്നത്.

വൈദ്യുതി ബോര്‍ഡ് ഉത്പാദിപ്പിക്കുന്ന വൈദ്യുതിയുടെ ചെലവ് കുറയ്ക്കാന്‍ സാധിച്ചിട്ടുണ്ട്. വിലകുറഞ്ഞ വൈദ്യുതി ഉത്പാദിപ്പിക്കുന്നതിന് പണി നടക്കുന്ന ജലവൈദ്യുത പദ്ധതികള്‍ പെട്ടെന്ന് പൂര്‍ത്തിയാക്കും.

കഴിഞ്ഞ അഞ്ച് വര്‍ഷമായി പണി പൂര്‍ത്തിയാവാതെ കിടന്ന മലമ്പുഴ പദ്ധതിയില്‍ നിന്നും വൈദ്യുതി ഉത്പാദിപ്പിക്കാന്‍ തുടങ്ങി. കഴിഞ്ഞ ഏഴ് വര്‍ഷമായി ഉത്പാദനം നടക്കാത്ത കുറ്റിയാടി പദ്ധതിയുടെ പണി ഫിബ്രവരിയില്‍ പുനരാരംഭിക്കും.