2003 നിക്ഷേപവര്ഷം: മുഖ്യമന്ത്രി
കൊച്ചി: 2003 കേരളത്തിന് നിക്ഷേപത്തിന്റെ വര്ഷമായി പ്രഖ്യാപിയ്ക്കാന് സര്ക്കാര് തീരുമാനിച്ചതായി മുഖ്യമന്ത്രി എ.കെ. ആന്റണി. ജനവരി 18 ശനിയാഴ്ച ജിം ഉദ്ഘാടന വേദിയില് സംസാരിക്കുകയായിരുന്നു മുഖ്യമന്ത്രി. ജിമ്മില് അവതരിപ്പിയ്ക്കുന്ന പദ്ധതികള് സമയ ബന്ധിതമായി നടപ്പാക്കാന് വേണ്ട നടപടികള് സ്വീകരിയ്ക്കും. കേരളത്തില് നിക്ഷേപം നടത്തി മാതൃകയായ നിക്ഷേപകരെ മുഖ്യമന്ത്രി അഭിനന്ദിച്ചു. നിങ്ങളാണ് സമ്മേളനത്തിന് എത്തിയവര്ക്ക് പ്രചോദനം.- ആന്റണി പറഞ്ഞു.
പ്രതിപക്ഷനേതാവ് ജിമ്മിനെക്കുറിച്ചുള്ള ആശങ്ക വ്യക്തമാക്കിയിരുന്നു. എല്ലാ പദ്ധതികളും ആവശ്യമായി ചര്ച്ച നടത്തി മാത്രമേ തീരുമാനിയ്ക്കൂ. തുടര്ന്നും പ്രതിപക്ഷവുമായി ചര്ച്ച നടത്തുമെന്ന് അവര്ക്ക് ഉറപ്പ് നല്കുന്നു.- മുഖ്യമന്ത്രി പറഞ്ഞു.
കേരളം നിക്ഷേപക സൗഹൃദമായി മാറിയിരിക്കുന്നു. പുതിയ കേരളം ഇനിയും വികസനം ആഗ്രഹിക്കുന്നു. കേരളം ഇന്ത്യയിലെ ഏറ്റവും മതസൗഹാര്ദ്ദമായ സംസ്ഥാനമാണ്. കേരളത്തില് വികസനത്തിനായി പരിഷ്ക്കാരങ്ങള് ആവശ്യമാണ്. യു.ഡി.എഫ് സര്ക്കാര് അധികാരമേറിയപ്പോള് കേരളം സാമ്പത്തിക വളര്ച്ചയില് വളരെ പിന്നിലായിരുന്നു. സാമ്പത്തിക സ്ഥിതി മെച്ചപ്പെടാന് സ്വകാര്യ നിക്ഷേപം അനിവാര്യമാണ്. ഇപ്പോള് പല ധനകാര്യസ്ഥാപനങ്ങളില് നിന്നും കടമെടുത്ത് അടിസ്ഥാന സൗകര്യങ്ങള് ഒരുക്കുകയാണ്. - ആന്റണി ചൂണ്ടിക്കാട്ടി.