മൊബൈല് തര്ക്കം തീര്ന്നു
ദില്ലി: മൊബൈല് ഫോണ് കമ്പനികള് നടത്തിവന്നിരുന്ന സമരം പിന്വലിച്ചു. കേന്ദ്ര വാര്ത്താവിനിമയ മന്ത്രി പ്രമോദ് മഹാജനുമായി നടത്തിയ ചര്ച്ചയെ തുടര്ന്നാണ് സമരം പിന്വലിച്ചത്.
പുതിയ ഒത്തുതീര്പ്പു ഫോര്മുല പ്രകാരം മൊബൈല് കമ്പനികള് അടിസ്ഥാനഫോണുകളിലേക്ക് (വയര്ലെസ് ലോക്കല് ഫോണുകള്)കോളുകള് കൈമാറാമെന്ന് സമ്മതിച്ചു. ഇപ്പോള് അടിസ്ഥാന ഫോണ് സര്വീസ് തുടങ്ങിയ ടാറ്റാ ടെലി സര്വീസിലേക്ക് കാളുകള് കൈമാറില്ലെന്നും, അവിടെ നിന്നുള്ള കാളുകള് സ്വീകരിക്കില്ലെന്നും പിടിവാശിയിലായിരുന്നു സ്വകാര്യ മൊബൈല് കമ്പനികള്. ഇതിനെ തുടര്ന്ന് ടെലകോം റഗുലേറ്ററി അഥോറിട്ടി (ട്രായ്) സ്വകാര്യ മൊബൈല് കമ്പനികള്ക്ക് ലക്ഷങ്ങള് പിഴ വിധിച്ചിരുന്നു. അധികം വൈകാതെ സ്വകാര്യ മൊബൈല് കമ്പനികളുടെ കാളുകള് തടഞ്ഞുകൊണ്ട് സര്ക്കാര് ഫോണ്കമ്പനിയായ എംടിഎന്എല് പകരം വീട്ടാനും തുടങ്ങി.
മൊബൈല് കമ്പനികളുടെ സമരം മൂലം കഴിഞ്ഞ ഏതാനും ദിവസങ്ങളായി ദില്ലി, മുംബൈ നഗരങ്ങളില് ഉപഭോക്താക്കള് ഏറെ കഷ്ടപ്പെട്ടിരുന്നു. ഈ പശ്ചാത്തലത്തിലാണ് കേന്ദ്ര മന്ത്രി പ്രമോദ് മഹാജന് ഇടപെട്ടത്.