ബജറ്റ് സമ്മേളനം വെള്ളിയാഴ്ച മുതല്‍

തിരുവനന്തപുരം: നിയമസഭയുടെ ബജറ്റ് സമ്മേളനം ജനവരി 24 വെള്ളിയാഴ്ച ആരംഭിക്കും.

ഗവര്‍ണര്‍ സിക്കന്ദര്‍സിങ് ഭക്ത് നയപ്രഖ്യാപന പ്രസംഗം നടത്തും. മാര്‍ച്ച് 14ന് ധനകാര്യമന്ത്രി കെ. ശങ്കരനാരായണന്‍ ബജറ്റ് അവതരിപ്പിക്കും.

ജിം നല്‍കിയ ആത്മവിശ്വാസത്തോടെയായിരിക്കും ഭരണപക്ഷം പ്രതിപക്ഷത്തെ നേരിടുക. അതേ സമയം സര്‍ക്കാരിനെ ആക്രമിക്കാന്‍ ആയുധങ്ങള്‍ പ്രതിപക്ഷത്തിന്റെ കൈയിലുമുണ്ട്.

ഒരു മാസം മുമ്പുവരെയില്ലാതിരുന്ന ആത്മവിശ്വാസത്തോടെയാണ് മുഖ്യമന്ത്രിയും മന്ത്രിമാരും നിയമസഭയിലെത്തുന്നത്. കേരളത്തിന് പുതിയൊരു വികസന സംസ്കാരത്തിന് തുടക്കം കുറിക്കുകയാണ് സര്‍ക്കാരെന്ന അവകാശവാദത്തോടെ ഭരണത്തിന്റെ നേട്ടത്തെ ഉയര്‍ത്തിപ്പിടിക്കാനാണ് ഭരണപക്ഷം ശ്രമിക്കുക.

അതേ സമയം ജിമ്മിനെ അനുകൂലിച്ചെങ്കിലും ജിമ്മുമായി ബന്ധപ്പെട്ട വിവാദ പദ്ധതികള്‍ക്കെതിരെ രൂക്ഷവിമര്‍ശമായിരിക്കും പ്രതിപക്ഷം നടത്തുന്നത്. എ ഡി ബി വ്യവസ്ഥകളെ സംബന്ധിച്ച് ചര്‍ച്ച ചെയ്യാന്‍ നിയമസഭാ സമ്മേളനം വിളിച്ചുചേര്‍ക്കണമെന്ന് നേരത്തെ ആവശ്യപ്പെട്ടിരുന്ന പ്രതിപക്ഷം എ ഡി ബി വായ്പ സംബന്ധിച്ച പ്രശ്നങ്ങള്‍ പ്രധാന ചര്‍ച്ചാവിഷയമാക്കും.

കടല്‍ മണല്‍ വാരല്‍ പദ്ധതിയും വഷളായ ക്രമസമാധാനനിലയും ഭരണപക്ഷത്തെ ആക്രമിക്കാനുള്ള ആയുധങ്ങളായി പ്രതിപക്ഷം ഉപയോഗിക്കും.