തിരുവല്ലയില്‍ പള്ളിയില്‍ സംഘര്‍ഷം

പത്തനംതിട്ട: തിരുവല്ലയ്ക്കടുത്ത് മെപ്രാളില്‍ പള്ളിയില്‍ പ്രവേശിക്കുന്നതിനെ ചൊല്ലി പാത്രിയര്‍ക്കീസ്, യാക്കോബായ വിഭാഗങ്ങള്‍ തമ്മില്‍ സംഘര്‍ഷമുണ്ടായി.

ഈയിടെ സ്ഥാനമേറ്റ പാത്രിയര്‍ക്കീസ് വിഭാഗം മെത്രൊപ്പോലീത്ത യോഹന്നാന്‍ മാര്‍ മിലിത്തോസ് സെന്റ് ജോണ്‍സ് പള്ളിയില്‍ നടന്നുവരുന്ന വാര്‍ഷികാഘോഷവുമായി ബന്ധപ്പെട്ട് അവിടെയെത്തിയതിനെ തുടര്‍ന്നാണ് സംഘര്‍ഷാവസ്ഥയുണ്ടായത്.

പള്ളിയില്‍ ഇരുവിഭാഗവും മാറിമാറി പ്രാര്‍ഥന നടത്താമെന്ന് നേരത്തെ ഇരുവിഭാഗവും അംഗീകരിച്ചിരുന്നതാണ്. യാക്കോബായ വിഭാഗത്തിന്റെ ആഘോഷങ്ങള്‍ ജനവരി 20 തിങ്കളാഴ്ച കഴിഞ്ഞിരുന്നു.

എതിര്‍വിഭാഗം തടയുമെന്ന മുന്നറിയിപ്പ് ലഭിച്ചതിനെ തുടര്‍ന്ന് മെത്രാപ്പോലീത്ത ബുധനാഴ്ച പുലര്‍ച്ചെ ഒരു വള്ളത്തിലാണ് പള്ളിയില്‍ പ്രവേശിക്കാനായെത്തിയത്. പള്ളിയില്‍ പ്രവേശിച്ച് ആഘോഷത്തില്‍ പങ്കെടുത്ത മെത്രാപ്പോലീത്തയെ യാക്കോബായ വിഭാഗം തടഞ്ഞുവെച്ചു.

സംഭവസ്ഥലത്തെത്തിയ തിരുവല്ല ആര്‍ ഡി ഒ എ. ടി. ജെയിംസ് യാക്കോബായ വിഭാഗക്കാരുമായി ചര്‍ച്ച നടത്തി. ഡി വൈ എസ് പി കെ. ശിവദാസന്റെ നേതൃത്വത്തില്‍ പൊലീസ് സംഘം സംഭവസ്ഥലത്തെത്തി.

ചര്‍ച്ച നടക്കുന്നതിനിടയില്‍ യാക്കോബായ വിഭാഗത്തിന്റെ ശ്രദ്ധയില്‍ പെടാതെ മെത്രാപ്പോലീത്തയെ പൊലീസ് പള്ളിയ്ക്ക് പുറത്തെത്തിച്ചു. ഒരു വാഹനത്തില്‍ മെത്രാപ്പോലീത്ത തിരികെപോയി.

പിന്നീട് യാക്കോബായ വിഭാഗത്തിന്റെ നേതൃത്വത്തില്‍ പ്രതിഷേധ മാര്‍ച്ച് നടന്നു. മന്ത്രിസഭാ ഉപസമിതിയുടെ സാന്നിധ്യത്തില്‍ നടന്ന ചര്‍ച്ചയില്‍ തര്‍ക്കത്തിലുള്ള പള്ളികളില്‍ പ്രാര്‍ഥന നടത്തില്ലെന്ന ഒത്തുതീര്‍പ്പിലെത്തിയിരുന്നുവെന്നും അത് ലംഘിച്ചാണ് മെത്രാപ്പോലീത്ത പള്ളിയിലെത്തിയതെന്നും മാര്‍ച്ചിനെ അഭിസംബോധന ചെയ്ത ഡോ. കാരക്കല്‍ ആരോപിച്ചു.