ഫോണ്‍ വാടകനിരക്ക് കൂട്ടി

ദില്ലി: അടിസ്ഥാന ടെലിഫോണിന്റെ മാസവാടക വര്‍ധിപ്പിക്കാന്‍ ടെലികോം റഗുലേറ്ററി അതോറിറ്റി തീരുമാനിച്ചു. ലോക്കല്‍ കാളിന്റെ സമയം മൂന്നുമിനിറ്റില്‍ നിന്ന് രണ്ടുമിനിറ്റായി ചുരുക്കുകയും ചെയ്തു.

ഏപ്രില്‍ ഒന്നു മുതല്‍ ഈ തീരുമാനം പ്രാബല്യത്തില്‍ വരും. നഗരത്തില്‍ ഫോണ്‍ മാസവാടക 250 രൂപയില്‍ നിന്ന് 280 രൂപയായി വര്‍ധിപ്പിച്ചു. ഒരു ഫോണില്‍ നിന്നുള്ള സൗജന്യ കാളുകള്‍ നഗരത്തില്‍ 30 എണ്ണമാക്കി വെട്ടിച്ചുരുക്കി. നേരത്തെ നഗരത്തില്‍ 60 സൗജന്യകാളുകള്‍ ഒരു മാസം അനുവദിച്ചിരുന്നു.

വയര്‍ലെസ് ഫോണുകളില്‍ സൗജന്യകാളുകള്‍ ഉണ്ടായിരിക്കില്ല. 50 കിലോമീറ്റര്‍ വരെയുള്ള ദൂരം ഇനി മുതല്‍ ലോക്കല്‍ കാളുകളുടെ പരിധിയില്‍ വരും. ഇത്രയും ദൂരത്തില്‍ ഉള്ള കാളുകള്‍ക്ക് മിനിറ്റിന് 1.20 രൂപ മാത്രമേ ഈടാക്കൂ.