വീരപ്പനുമായി സേന ഏറ്റുമുട്ടി
ബാംഗ്ലൂര്: കര്ണ്ണാടക ദൗത്യസേനാംഗങ്ങള് വീരപ്പനുമായി ഏറ്റുമുട്ടി. തമിഴ്നാട്-കര്ണ്ണാടക അതിര്ത്തിയിലെ ഗോപിനത്തം പ്രദേശത്ത് വച്ചായിരുന്നു ഏറ്റുമുട്ടല്. വീരപ്പന്റെ ജന്മഗ്രാമമാണ് ഗോപിനത്തം.
ഗോപിനത്തം വനമേഖലയിലൂടെ വീരപ്പനും സംഘവും നീങ്ങുന്നതായ സൂചന ലഭിച്ചതിനെ തുടര്ന്ന് കര്ണ്ണാടക ദൗത്യസേനാംഗങ്ങള് പാഞ്ഞുചെല്ലുകയായിരുന്നു. കമാന്റര് ജ്യോതിപ്രകാശിന്റെ നേതൃത്വത്തിലുള്ള സംഘമാണ് പോയത്. തുടര്ന്ന് ഇരുകൂട്ടരും പരസ്പരം വെടിവച്ചു.
വീരപ്പന് സംഘമാണ് ആദ്യം വെടിയുതിര്ത്തത്. ഇതിനെ തുടര്ന്ന് കര്ണ്ണാടക ദൗത്യസേന തമിഴ്നാട് ദൗത്യസേനയെ വിവരമറിയിച്ചു. ഇരു ദൗത്യസേനയുടെയും കൂടുതല് അംഗങ്ങള് എത്തിയതോടെ വനപ്രദേശം സേന വളഞ്ഞു. തുടര്ന്ന് ഇരുകൂട്ടരും തമ്മില് വെടിവെപ്പുണ്ടായി. ഇപ്പോള് ഏകദേശം ദൗത്യസേനയിലെ 1500 പേര് ഗോപിനത്തം വളഞ്ഞിരിക്കുകയാണ്. ഇവിടുത്തെ വീടുകളിലും തിരച്ചില് നടത്തുന്നുണ്ട്.
ആര്ക്കെങ്കിലും പരിക്കുള്ളതായി അറിവില്ല. നാഗപ്പയുടെ ജഡം കണ്ടെടുത്ത ശേഷമുള്ള ആദ്യ ഏറ്റുമുട്ടലാണ് ഇത്.
കഴിഞ്ഞ ദിവസങ്ങളില് രണ്ട് തവണയായി ദൗത്യ സേന വീരപ്പനുമായി ബന്ധമുള്ള ചിലരെ പിടികൂടിയിരുന്നു.