ഐ ഗ്രൂപ്പിനെതിരെ മുരളി വീണ്ടും
തിരുവനന്തപുരം: ഐ ഗ്രൂപ്പിനെതിരെ പരസ്യവിമര്ശനവുമായി കെപിസിസി പ്രസിഡന്റ് കെ. മുരളീധരന് വീണ്ടും. നിയമസഭയിലെ നന്ദിപ്രമേയചര്ച്ചയില് ഐ വിട്ടുനില്ക്കേണ്ട കാര്യമില്ലെന്ന് മുരളീധരന് തുറന്നടിച്ചു.
ജനവരി 26 ഞായറാഴ്ച വിദേശയാത്രകഴിഞ്ഞ് മടങ്ങിയെത്തിയ അദ്ദേഹം വാര്ത്താലേഖരോട് സംസാരിക്കുകയായിരുന്നു. ജനപ്രതിനിധികള് എന്ന നിലയില് നിയമസഭയില് നന്ദിപ്രമേയചര്ച്ചയില് എല്ലാവരും പങ്കെടുക്കേണ്ടതാണെന്നും മുരളി പറഞ്ഞു.
ഭരണകക്ഷി എംഎല്എമാര് പ്രത്യേകിച്ചും ചര്ച്ചയില് പങ്കെടുക്കാന് ബാധ്യസ്ഥരാണ്. സമയപരിമിതിയുള്ളതിനാല് എല്ലാവര്ക്കും സംസാരിക്കാന് സമയം കിട്ടിയെന്നുവരില്ല. പക്ഷെ എല്ലാവരും സംസാരിക്കാന് തയ്യാറായിരിക്കണം. ഇപ്പോള് ഏതെങ്കിലും ഗ്രൂപ്പ് ഇത്തരം കാര്യങ്ങളില് വിട്ടുനില്ക്കേണ്ടതായ ഒരു സ്ഥിതിവിശേഷവും ഇല്ല. - മുരളീധരന് പറഞ്ഞു.
ശോഭനാ ജോര്ജ്ജ് നിയമസഭയില് പങ്കെടുക്കുന്നതിനെ പാര്ട്ടി വിലക്കിയിട്ടില്ല. അതേ സമയം കോണ്ഗ്രസ് നേതൃത്വം ഏര്പ്പെടുത്തിയ നിയന്ത്രണം ശോഭനയ്ക്ക് നിയമസഭയ്ക്കകത്തും ബാധകമായിരിക്കുമെന്നും മുരളീധരന് പറഞ്ഞു.