ആന്റണിയെ കാണാം: ജയലളിത

ചെന്നൈ: തടയണയുടെ നിര്‍മ്മാണ പ്രവര്‍ത്തനങ്ങള്‍ നിര്‍ത്തിവയ്ക്കാന്‍ കേരളാ മുഖ്യമന്ത്രി എ.കെ. ആന്റണിയെ കാണാന്‍ തനിക്ക് വിരോധമില്ലെന്ന് തമിഴ്നാട് മുഖ്യമന്ത്രി ജെ. ജയലളിത. കേരളവുമായി ചര്‍ച്ച ചെയ്യുന്നതിന് മുമ്പായി നിയമവിദഗ്ധരുമായി കൂടിക്കാഴ്ചകള്‍ നടത്തിവരികയാണെന്നും ജയലളിത പറഞ്ഞു.

ഭവാനിപ്പുഴയില്‍ കേരളം തടയണ കെട്ടുന്നതുമായി ബന്ധപ്പെട്ടുള്ള ചോദ്യത്തിന് ജനവരി 29 ബുധനാഴ്ച നിയമസഭയില്‍ മറുപടി പറയുകയായിരുന്നു ജയലളിത. ഈ പ്രശ്നത്തില്‍ ഇതിനകം കാവേരി നദീജല തര്‍ക്ക ട്രിബ്യൂണലിനെ സമീപിച്ചിട്ടുണ്ട്. കേരളവുമായുള്ള ചര്‍ച്ചകള്‍ പക്ഷെ കാവേരി ട്രിബ്യൂണല്‍ വഴി ഒരു പരിഹാരം കാണാനുള്ള ശ്രമങ്ങള്‍ക്ക് തടസ്സമാകരുതെന്നുണ്ടെന്നും ജയലളിത പറഞ്ഞു.

കാവേരി ട്രിബ്യൂണല്‍ വഴിയല്ലാതെ, കേരളവുമായി ഒരു ചര്‍ച്ചയിലൂടെ പ്രശ്നം പരിഹരിക്കണമെന്ന് ഡിഎംകെ ഉപനേതാവ് ദുരൈ മുരുകന്‍ അഭിപ്രായപ്പെട്ടു. കാവേരി ട്രിബ്യൂണല്‍ വഴിയുള്ള പരിഹാരത്തിന് ധാരാളം സമയമെടുക്കുമെന്നും ദുരൈ മുരുകന്‍ പറഞ്ഞു. ഈ പ്രശ്നത്തില്‍ താന്‍ കേരള മുഖ്യമന്ത്രി എ.കെ. ആന്റണിയ്ക്ക് കത്തയച്ചിട്ടുണ്ട്. എന്നാല്‍ മറുപടി താമസിച്ചെന്നും ജയലളിത അറിയിച്ചു.