സര്‍ക്കാര്‍ ഉത്തരവ് പാലിച്ചില്ലെങ്കില്‍ കോളെജുകളുടെ അംഗീകാരം റദ്ദാക്കും

തിരുവനന്തപുരം: സ്വശ്രയ വിദ്യാഭ്യാസ സ്ഥാപനങ്ങള്‍ 50 ശതമാനം സീറ്റുകളില്‍ മാര്‍ക്ക് അടിസ്ഥാനത്തില്‍ വിദ്യാര്‍ത്ഥികളെ പ്രവേശിപ്പിച്ചില്ലെങ്കില്‍ സ്ഥാപനങ്ങളുടെ അനുമതി നിഷേധിയ്ക്കുന്നതുള്‍പ്പടെയുള്ള നടപടികള്‍ സ്വീകരിയ്ക്കാന്‍ സര്‍ക്കാര്‍ മടിയ്ക്കില്ലെന്ന് വിദ്യാഭ്യാസമന്ത്രി.

നിയമസഭയില്‍ ഒരു സബ്മിഷന് മറുപടി പറയവേയാണ് മന്ത്രി ഈ വെളിപ്പെടുത്തല്‍ നടത്തിയത്. ഇക്കാര്യത്തില്‍ സുപ്രീം കോടതിയെ സമീപിയ്ക്കണമോയെന്ന് സര്‍ക്കാര്‍ നിയമോപദേശം തേടിയിരിയ്ക്കുകയാണ്. സ്വാശ്രയ കോളെജുകളിലെ മാനേജ്മെന്റ് ക്വാട്ട 75 ശതമാനമാക്കിയ ഹൈ കോടതി കോടതി വിധിയ്ക്ക് എതിരെ സുപ്രീം കോടതിയെ സമീപിയ്ക്കാനാണ് സര്‍ക്കാര്‍ ഉദ്ദേശിയ്ക്കുന്നത്.

സ്വകാര്യ കോളെജ് ഉടമസ്ഥരുമായി ചേര്‍ന്ന് സര്‍ക്കാര്‍ ഒളിച്ചുകളി നടത്തുന്നെന്നായിരുന്നു മാര്‍ക്സിസ്റ് അംഗം മത്തായി ചാക്കൊ സബ്മിഷന്‍ ഉന്നയിച്ചുകൊണ്ട് ആരോപിച്ചത്. തിരുവല്ല പുഷ്പഗിരി കോളെജും കോലഞ്ചേരി മെഡിയ്ക്കല്‍ മിഷന്‍ കോളെജും നല്‍കിയ ഹര്‍ജിയില്‍ സര്‍ക്കാര്‍ വേണ്ടരീതിയില്‍ കാര്യങ്ങള്‍ കോടതിയില്‍ വ്യക്തമാക്കിയില്ല. ഈ കേസിലാണ് 75 ശതമാനം സീറ്റുകള്‍ മാനേജ്മെന്റിന് അനുവദിയ്ക്കുന്ന വിധിയുണ്ടായത്.

50 ശതമാനം സീറ്റുകള്‍ മാര്‍ക്ക് അടിസ്ഥാനത്തില്‍ നല്‍കാത്ത കോളെജുകളുടെ അംഗീകാരം റദ്ദാക്കിയാല്‍ ആ നടപടിയില്‍ പ്രതിപക്ഷത്തിന്റെ പൂര്‍ണ്ണ പിന്തുണയുമുണ്ടാവുമെന്ന് പ്രതിപക്ഷ ഉപനേതാവ് കൊടിയേരി ബാലകൃഷ്ണന്‍ പറഞ്ഞു.