മൂന്ന് ഉദ്യോഗസ്ഥര്‍ക്ക് കഠിനതടവ്

തൃശൂര്‍: പൊതുമുതല്‍ ദുരുപയോഗം ചെയ്തതിനും അതുവഴി ഖജനാവിന് നഷ്ടമുണ്ടാക്കിയതിനും മൂന്ന് ഉദ്യോഗസ്ഥര്‍ക്ക് കഠിന തടവ്. തൃശൂര്‍ വിജിലന്‍സ് കോടതിയാണ് നാല് വര്‍ഷത്തെ കഠിനതടവും 50,000 രൂപ പിഴയും വിധിച്ചത്.

ഫസ്റ് ഗ്രേഡ് ഓഫീസര്‍ പി.എന്‍. വാസു, മുന്‍ അസിസ്റന്റ് എക്സിക്യൂട്ടീവ് എഞ്ചിനീയര്‍ കെ. തമ്പി കൃഷ്ണന്‍കുട്ടി, ഇടുക്കി ഡിആര്‍ഡിഎയില്‍ അസിസ്റന്റ് എക്സിക്യൂട്ടീവ് എഞ്ചിനീയര്‍ കെ. ഇന്ദുചൂഡന്‍ എന്നിവര്‍ക്കെതിരെയാണ് ശിക്ഷ. പിഴ അടച്ചില്ലെങ്കില്‍ ഒന്നര വര്‍ഷം കൂടി കഠിനതടവ് അനുഭവിക്കണം.

തൃശൂര്‍ വിജിലന്‍സ് കോടതി സ്പെഷ്യല്‍ ജഡ്ജി എസ്. സതീനാഥനാണ് ജനവരി 30 വ്യാഴാഴ്ച ശിക്ഷ വിധിച്ചത്. മൂന്ന് പ്രതികളും എ.എം. സെബാസ്റ്യന്‍ എന്നൊരാളും കൂടി ഗൂഡാലോചന നടത്തിയ ശേഷം 1997ല്‍ ഇടുക്കി ജില്ലയിലെ ഞാറളംപുഴ റോഡിന്റെ അറ്റകുറ്റപ്പണികള്‍ ഏറ്റെടുക്കാന്‍ തീരുമാനിച്ചു.

ഗുണനിലവാരം കുറഞ്ഞ സാധനങ്ങള്‍ ഉപയോഗിച്ച് താഴ്ന്നനിലവാരത്തിലുള്ള പണിയാണ് ഇവര്‍ ചെയ്തത്. ഇതുവഴി നല്ലൊരു തുക ഇവര്‍ തട്ടിയെടുത്തു. ഇതില്‍ മൂന്നാം പ്രതി കെ. ഇന്ദുചൂഡന്‍ വിചാരണയ്ക്കിടയില്‍ മരിച്ചു.