ഫോര്‍ട്ട് കൊച്ചിയില്‍ കഥകളി കേന്ദ്രത്തിന് തീവെച്ചു

കൊച്ചി: ഫോര്‍ട്ട്കോച്ചി വാസ്കോഡഗാമ സ്ക്വയറിലെ അനധികൃതമായി പ്രവര്‍ത്തിച്ചുവന്നിരുന്ന ചില കടകള്‍ അധികൃതര്‍ പൊളിച്ചുനീക്കിയതിനെ തുടര്‍ന്ന് സാമൂഹ്യ വിരുദ്ധര്‍ കഥകളി കേന്ദ്രത്തിനും അടുത്തുള്ള റെസ്റോറന്റിനും തീവെച്ചു.

ഫോര്‍ട്ട് കൊച്ചി പൈതൃക മേഖല സംരക്ഷിക്കുന്നതിനും മോടിപിടിപ്പിക്കുന്നതിനുമുള്ള പദ്ധതിയുടെ ഭാഗമായാണ് കടകള്‍ പൊളിച്ചുനീക്കിയത്.

ജനവരി 30 വെള്ളിയാഴ്ച രാവിലെയാണ് കടകള്‍ പൊളിച്ചുനീക്കിയത്. ഇതിന് മുമ്പ് രണ്ട് തവണ പൊളിച്ചുനീക്കിയ കടകള്‍ ഉടമസ്ഥര്‍ വീണ്ടും സ്ഥാപിക്കുകയായിരുന്നു. അഞ്ച് കടയുമടസ്ഥര്‍ കോടതിയില്‍ നിന്ന് സ്റേ വാങ്ങിയിരുന്നതിനാല്‍ ബാക്കിയുള്ള നാല് കടകള്‍ മാത്രമേ പൊളിച്ചുനീക്കാനായുള്ളൂ.

വൈകുന്നേരം മൂന്ന് മണിയോടെ ചിലര്‍ സ്ഥലത്തെത്തി പൊളിച്ചുനീക്കുന്നതിന് സ്റേയുള്ള ഒരു കടയില്‍ നിന്ന് സാധനങ്ങളെല്ലാം പുറത്തെടുത്തിട്ട് കടയ്ക്ക് തീവെച്ചു. പിന്നീടാണ് അക്വാറ്റിക് ക്ലബ് കെട്ടിടത്തിനോട് അനുബന്ധിച്ചു പ്രവര്‍ത്തിക്കുന്ന കഥകളി കേന്ദ്രത്തിനും റെസ്റോറന്റിനും തീവെച്ചത്.