വിഎസിനെതിരെ പിണറായി
തിരുവനന്തപുരം: കൊക്കകോള, പെരിയാര്, പാതിരാമണല് പദ്ധതികളെക്കുറിച്ച് സിപിഎം അന്വേഷണം നടത്തുമെന്ന വി.എസ്. അച്യുതാനന്ദന്റെ പ്രസ്താവന സിപിഎം സംസ്ഥാനസെക്രട്ടറി പിണറായി വിജയന് നിഷേധിച്ചു. മുന് എല് ഡി എഫ് സര്ക്കാരിന്റെ കാലത്ത് പാര്ട്ടിയെ അറിയിക്കാതെ പദ്ധതികള്ക്ക് അനുമതി നല്കിയതിനെ കുറിച്ച് പാര്ട്ടി തലത്തില് ഒരന്വേഷണവും നടത്തില്ലെന്ന് പിണറായി പറഞ്ഞു.
പ്ലാച്ചിമടയില് കൊക്ക കോളയ്ക്കും പെരിയാര് വ്യവസായ ജലവിതരണ പദ്ധതിയ്ക്കും അനുമതി നല്കിയതിനെ കുറിച്ചും പാതിരാമണല് ഒബ്റോയിക്ക് കൈമാറാനുള്ള തീരുമാനവും പാര്ട്ടി അന്വേഷിക്കുമെന്നാണ് വിഎസ് കഴിഞ്ഞ ദിവസം വാര്ത്താസമ്മേളനത്തില് പറഞ്ഞത്. ഇതിന് കടകവിരുദ്ധായാണ് സിപിഎം സംസ്ഥാന സമിതിയോഗത്തിന് ശേഷം നടത്തിയ വാര്ത്താസമ്മേളനത്തില് പിണറായി വിജയന് പ്രതികരിച്ചത്. പെരിയാര് ജലവിതരണ പദ്ധതിയെക്കുറിച്ച് സാധ്യതാപഠനം നടത്താന് അന്നത്തെ ജലമന്ത്രിയായിരുന്ന ബേബിജോണ് നല്കിയ ഫയലില് ഒപ്പിടുക മാത്രമാണ് മുഖ്യമന്ത്രി ചെയ്തത്. കൊക്കൊകോളയ്ക്ക് ഭൂഗര്ഭജലം ഊറ്റാന് അനുവദിച്ചത് ആരായാലും ആ തെറ്റ് ആവര്ത്തിക്കരുത്. ഇനി കൊക്കൊകോളയ്ക്ക് വെള്ളം ഊറ്റാന് പറ്റില്ലെന്ന നിലപാടാണ് ഇപ്പോഴത്തെ സര്ക്കാര് ചെയ്യേണ്ടത്. - പിണറായി വിജയന് പറഞ്ഞു.