മക്കയില്‍ തീര്‍ഥാടക ലക്ഷങ്ങള്‍

മക്ക: ഹജ്കര്‍മ്മത്തില്‍ പങ്കെടുക്കാനായി ലോകത്തിന്റെ നാനാഭാഗത്തുനിന്നുള്ള ലക്ഷക്കണക്കിന് വിശ്വാസികള്‍ വിശുദ്ധനഗരമായ മക്കയിലെത്തി. മക്കയിലെ ഹറം പള്ളിയില്‍ കഴിഞ്ഞ ദിവസം നടന്ന ജുമുഅ നമസ്കാരത്തില്‍ ഏകദേശം 20 ലക്ഷം വിശ്വാസികള്‍ പങ്കെടുത്തതായാണ് ഔദ്യോഗിക കണക്ക്.

ജുമുഅ നമസ്കാരത്തില്‍ പങ്കെടുക്കാന്‍ വിശ്വാസികള്‍ തിക്കിത്തിരക്കിയപ്പോള്‍ ഹറം പള്ളിയുടെ തിരുമുറ്റവും കടന്ന് ചുറ്റുമുള്ള നിരത്തുകളും നിറഞ്ഞുകവിഞ്ഞു. പള്ളിയുടെ മൂന്ന് മുകള്‍ ത്തട്ടുകളും താഴെതട്ടും നിറഞ്ഞിരുന്നു.

ജീവിതത്തിലെ പാപക്കറ കഴുകിക്കളയാനും പ്രായശ്ചിത്ത വിചാരത്തോടെ നല്ല ജീവിതത്തിലേക്ക് മടങ്ങാനുമുള്ള മാര്‍ഗമാണ് പരിശുദ്ധ ഹജെന്ന് ഇമാം ഷെയ്ഖ് സുഊദ് ശുറൈമി ഖുതുബയില്‍ പറഞ്ഞു.

ഫിബ്രവരി 10 തിങ്കളാഴ്ചയാണ് ഹജ് കര്‍മ്മം. ഇതില്‍ പങ്കെടുക്കാനായി മക്കയിലെ ഹജ്കൂടാരങ്ങളില്‍ നിന്ന് ഹാജിമാര്‍ മിനയിലേക്ക് പുറപ്പെട്ടു തുടങ്ങി. ഫിബ്രവരി ഒമ്പത് ഞായറാഴ്ച മിനയില്‍ താമസിക്കുന്ന ഹാജിമാര്‍ തിങ്കളാഴ്ച പുലര്‍ച്ചെയോടെ അറഫ സംഗമിത്തനായി പുറപ്പെടും.

ഇന്ത്യയില്‍ നിന്ന് വ്യോമയാന വകുപ്പ് മന്ത്രി സയ്യിദ് ഷാനവാസ് ഹുസൈന്റെ നേതൃത്വത്തിലുള്ള 16അംഗസംഘം മക്കയില്‍ എത്തി. പ്രധാനമന്ത്രി വാജ്പേയിയുടെ സന്ദേശം സംഘം സൗദി രാജാവിന് കൈമാറും.