അക്ഷയ പദ്ധതി: കമ്പ്യൂട്ടറിന്റെ വില കുറച്ചു

മലപ്പുറം: അക്ഷയ സമ്പൂര്‍ണ ഇ-സാക്ഷരതാ പദ്ധതിയുടെ ഭാഗമായി മലപ്പുറം ജില്ലയില്‍ സംഘടിപ്പിച്ച കമ്പ്യൂട്ടര്‍ മേളയില്‍ കമ്പനികള്‍ കമ്പ്യൂട്ടറിന്റെ വിലയില്‍ വലിയ ഇളവ് നല്‍കാന്‍ തയ്യാറായി.മൂന്ന് ദിവസം നീണ്ടുനിന്ന മേള ഫിബ്രവരി 11 ചൊവാഴ്ചയാണ് സമാപിച്ചത്.40-ാളം വിവര സാങ്കേതിക വിദ്യാ കമ്പനികളാണ് മേളയില്‍ പങ്കെടുത്തത്.

അക്ഷയ പരിശീലന കേന്ദ്രങ്ങള്‍ സ്ഥാപിക്കുന്നതിന് തിരഞ്ഞടുക്കപ്പെട്ട സംരംഭകര്‍ അഞ്ച് മുതല്‍ 10 വരെ കമ്പ്യൂട്ടറുകള്‍ ഒന്നിച്ചുവാങ്ങുന്നതിനാല്‍ വിലയില്‍ വലിയ ഇളവ് തന്നെ വരുത്താന്‍ തന്നെ കമ്പനികള്‍ തയ്യാറായി. അഞ്ച് കമ്പ്യൂട്ടറുകള്‍ക്ക് 1.45 ലക്ഷം രൂപ വിലയിട്ടിരുന്ന ചില കമ്പനികള്‍ അത് 99,000 വരെയായി കുറച്ചു.

അക്ഷയ പദ്ധതിയ്ക്കായി പ്രത്യേക ആനുകൂല്യങ്ങള്‍ പ്രഖ്യാപിച്ചാണ്പല കമ്പനികളും മേളയിലെത്തിയത്. എ എം ഡി വിലയില്‍ 25 ശതമാനം കുറച്ചതോടെ പ്രധാന കമ്പനികളും അത്രയും കുറവ് വരുത്താന്‍ തയ്യാറായി. ബ്രാന്റ് ചെയ്യപ്പെടാത്ത കമ്പ്യൂട്ടറിന് 17,000 രൂപ വില കുറഞ്ഞു.ഓരോ കുടുംബത്തിലും കുറഞ്ഞത് ഒരാള്‍ക്ക് കമ്പ്യുട്ടര്‍ പരിശീലനം നല്‍കുകയാണ് അക്ഷയ പദ്ധതിയുടെ ലക്ഷ്യം.