വൈദ്യുതി: എഡിബി സംഘം ഏപ്രിലിലെത്തും

തിരുവനന്തപുരം: വൈദ്യുതി മേഖലയിലെ പരിഷ്കാരങ്ങള്‍ക്ക് ആയിരം കോടി രൂപ വായ്പ അനുവദിക്കുന്നതു സംബന്ധിച്ച അന്തിമചര്‍ച്ചകള്‍ ഏപ്രിലില്‍ നടക്കും. ഇതിനായി എ ഡി ബി സംഘം ഏപ്രിലില്‍ കേരളത്തിലെത്തും.

വൈദ്യുതി മേഖലയിലെ പരിഷ്കാരങ്ങള്‍ സംബന്ധിച്ച് കണ്‍സള്‍ട്ടന്‍സികള്‍ തയ്യാറാക്കിയ റിപ്പോര്‍ട്ട് എ ഡി ബി സംഘം പരിശോധിക്കും.

എ ഡി ബി സംഘം കഴിഞ്ഞ ദിവസം വൈദ്യുതി ബോര്‍ഡ് പ്രതിനിധികളുമായി ചര്‍ച്ച നടത്തിയിരുന്നു. നവംബറിലോ ഡിസംബറിലോ വായ്പ ലഭിക്കുമെന്നാണ് പ്രതീക്ഷിക്കുന്നതെന്ന് വൈദ്യുതി ബോര്‍ഡ് അധികൃതര്‍ പറഞ്ഞു.

വായ്പ നല്‍കുന്നതിന് മുമ്പായി എ ഡി ബി മാനേജ്മെന്റ് നേരിട്ട് മറ്റൊരു അന്വേഷണം കൂടി നടത്തും. വായ്പ നല്‍കുന്ന പണം വൈദ്യുതി ബോര്‍ഡിലെ പരിഷ്കാരങ്ങള്‍ക്ക് തന്നെയല്ലേ വിനിയോഗിക്കുന്നതെന്ന് ഉറപ്പ് വരുത്താന്‍ പ്രത്യേകം സംഘത്തെ നിയോഗിക്കും.