20 ആദിവാസികള്‍ കൊല്ലപ്പെട്ടെന്ന്

കോഴിക്കോട്: മുത്തങ്ങയിലെ പൊലീസ് വെടിവെപ്പില്‍ 20 ആദിവാസികള്‍ കൊല്ലപ്പെട്ടെന്ന് ആദിവാസി ദളിത് സംരക്ഷണസമിതി. ഫിബ്രവരി 21 വെള്ളിയാഴ്ച വാര്‍ത്താസമ്മേളനത്തിലാണ് സമിതി പ്രവര്‍ത്തകര്‍ ഇക്കാര്യം ആരോപിച്ചത്.

ഒരു വൃദ്ധയും രണ്ട് കുട്ടികളുമുള്‍പ്പെടെ 20 ആദിവാസികള്‍ കൊല്ലപ്പെട്ടിട്ടുണ്ട്. ഇവരുടെ ജഡങ്ങള്‍ പൊലീസ് പോസ്റുമോര്‍ട്ടം നടത്തിയ ശേഷം വിട്ടുതരണം. ആദിവാസി ആചാരപ്രകാരം ഇവരുടെ ജഡങ്ങള്‍ മറവ് ചെയ്യുമെന്നും സമിതി കണ്‍വീനര്‍ സ്പെന്‍സര്‍ മാര്‍ക്കേസ് പറഞ്ഞു.

1100 ആദിവാസികള്‍ മുത്തങ്ങയിലുണ്ടായിരുന്നു. ഇതില്‍ 30 പേര്‍ മാത്രമാണ് പൊലീസില്‍ കീഴടങ്ങിയത്. 240 പേരെ പൊലീസ് അറസ്റ് ചെയ്യുകയും ചെയ്തു. ബാക്കിയുള്ളവരെല്ലാം എവിടെയാണ്?- സമിതി പ്രവര്‍ത്തകര്‍ ചോദിച്ചു.

അതേ സമയം ഒരു ആദിവാസിയും ഒരു പൊലീസും മാത്രമേ കൊല്ലപ്പെട്ടുള്ളൂ എന്ന വാദത്തില്‍ സര്‍ക്കാര്‍ ഇപ്പോഴും ഉറച്ചുനില്ക്കുകയാണ്. ഫിബ്രവരി 21 വെള്ളിയാഴ്ചയും വാര്‍ത്താസമ്മേളനത്തില്‍ പാര്‍ലമെന്ററി കാര്യമന്ത്രി എം.എം. ഹസ്സന്‍ ഈ വാദം ആവര്‍ത്തിച്ചു.

ഇതിനിടയില്‍ ആദിവാസികളുടെ ജഡം പൊലീസ് എടുത്തുമാറ്റുന്നതായി കണ്ടെന്ന് സമീപവാസികള്‍ അവകാശപ്പെടുന്നു. ആദിവാസികളെ കുടിയൊഴിപ്പിക്കുന്ന പൊലീസ് നടപടി നിരീക്ഷിക്കാനെത്തിയ മാധ്യമപ്രവര്‍ത്തകരെയും സാമൂഹ്യപ്രവര്‍ത്തകരെയും ആട്ടിയോടിച്ച ശേഷമാണ് പൊലീസ് ഓപ്പറേഷന്‍ തുടങ്ങിയത്.