തീവ്രവാദ പ്രവര്ത്തനമുണ്ടാവുമെന്ന് പൊലീസ്
തിരുവനന്തപുരം: മുത്തങ്ങയില് നടന്ന ആദിവാസി പ്രക്ഷോഭത്തിന്റെ പശ്ചാത്തലത്തില് ഇടതുതീവ്രവാദ സംഘടനകളുടെ ഭാഗത്തു നിന്ന് കൂടുതല് ശക്തമായ നീക്കങ്ങളുമുണ്ടാവുമെന്നാണ് പൊലീസിന്റെ നിഗമനം.
അയ്യങ്കാളിപ്പട പ്രവര്ത്തകര് കോലഞ്ചേരി വില്ലേജ് ഓഫീസില് അതിക്രമിച്ചുകയറി ഫയലുകള് നശിപ്പിച്ച സംഭവം കൂടുതല് തീവ്രവാദ നീക്കങ്ങളുണ്ടാവുമെന്നതിന്റെ സൂചനയായാണ് പൊലീസ് കാണുന്നത്.
സി പി എം (എം എല്) റെഡ് ഫ്ലാഗ്, സി പി ഐ (എം എല്) ജനശക്തി, മാവോയിസ്റ് ഐക്യ കേന്ദ്രം എന്നിവയുള്പ്പെടെ കേരളത്തില് 32 ഇടതു തീവ്രവാദ സംഘടനകള് പ്രവര്ത്തിക്കുന്നുണ്ടെന്നാണ് പൊലീസ് പറയുന്നത്. പോരാട്ടം പോലുള്ള സംഘനകള് ഈയിടെയായി ശക്തമായ നീക്കങ്ങളിലേര്പ്പെട്ടിരിക്കുകയാണെന്ന് പൊലീസ് ചൂണ്ടിക്കാട്ടുന്നു.
സംസ്ഥാനത്തിന് പുറത്തുനിന്നുള്ള ശക്തികള് ഇവര്ക്ക് പിന്നില് പ്രവര്ത്തിക്കുന്നുണ്ടെന്നാണ് നിഗമനം. പീപ്പിള്സ് വാര് ഗ്രൂപ്പിന്റെ താത്വികനായ ഭാവറാവു ഈയിടെ വയനാട്ടിലെത്തുകയും ഭൂമിയ്ക്കു വേണ്ടി ആയുധമെടുക്കാന് ആദിവാസികളോട് ആഹ്വാനം ചെയ്യുകയും ചെയ്തിരുന്നു. മുത്തങ്ങയിലെ പൊലീസുകാരന്റെ വധം നക്സല് ശൈലിയിലുളളതാണെന്ന് പൊലീസ് പറയുന്നു.
മുത്തങ്ങയിലെ ഏറ്റുമുട്ടലിന്റെ വീഡിയോ റിക്കോഡിംഗില് ചുവപ്പുവേഷം ധരിച്ച അമ്പതോളം പേരുണ്ടായിരുന്നുവെന്നും ഇവര് പി ഡബ്ല്യു ജി പ്രവര്ത്തകരണെന്ന് സംശയിക്കുന്നതായും ഒരു പൊലീസ് ഉദ്യോഗസ്ഥന് പറഞ്ഞു.