ഐശ്വര്യയുടെ വിവാഹത്തിന് താരനിര

ദില്ലി: കോണ്‍ഗ്രസ് നേതാവ് കെ. കരുണാകരന്റെ കൊച്ചുമകളുടെ വിവാഹസ്വീകരണച്ചടങ്ങില്‍ വിഐപികളുടെ തിക്കും തിരക്കും. പത്മജയുടെ മകളായ ഐശ്വര്യയുടെ വിവാഹ വിരുന്ന് നടന്ന ദില്ലിയിലെ വേദിയില്‍ എത്തിയ ഏറ്റവും പ്രധാന വിഐപി ആഭ്യന്തരമന്ത്രിയും ഉപപ്രധാനമന്ത്രിയുമായ എല്‍.കെ. അദ്വാനി.

ഉപരാഷ്ട്രപതി ഭൈരോണ്‍ സിംഗ് ഷെഖാവത്ത്, മുന്‍ രാഷ്ട്രപതിമാരായ ആര്‍. വെങ്കിട്ടരാമന്‍, കെ.ആര്‍. നാരായണന്‍, മുന്‍ പ്രധാനമന്ത്രിമാരായ ദേവഗൗഡ, ഐ.കെ. ഗുജ്റാള്‍, പി.വി. നരസിംഹറാവു, കോണ്‍ഗ്രസ് അധ്യക്ഷ സോണിയാഗാന്ധി, ലോക്സഭാ സ്പീക്കര്‍ മനോഹര്‍ ജോഷി, ഡപ്യൂട്ടി സ്പീക്കര്‍ പി.എം. സയിദ്, മുഖ്യമന്ത്രിമാരായ ഷീലാ ദീക്ഷിത്, സുശീല്‍കുമാര്‍ ഷിന്‍ഡെ, കാബിനറ്റ് മന്ത്രിമാര്‍ എന്നിവരും പങ്കെടുത്തു.

കെപിസിസി പ്രസിഡന്റ് കെ. മുരളീധരനും പത്മജയും പത്മജയുടെ ഭര്‍ത്താവ് വേണുഗോപാലും ഉടനീളം സന്നിഹിതരായിരുന്നു. നിയമസഭ നടക്കുന്ന സമയമായതിനാല്‍ കേരളത്തില്‍ നിന്നുള്ള രാഷ്ട്രീയ നേതാക്കളുടെ സാന്നിധ്യം ശുഷ്കമായിരുന്നു.