മുത്തങ്ങ: ജുഡീഷ്യല്‍ അന്വേഷണം വേണമെന്ന് കരുണാകരന്‍

തിരുവനന്തപുരം: മുത്തങ്ങയില്‍ നടന്ന പൊലീസ് വെടിവെപ്പിനെക്കുറിച്ച് ജുഡീഷ്യല്‍ അന്വേഷണം വേണമെന്ന് മുതിര്‍ന്ന കോണ്‍ഗ്രസ് നേതാവ് കെ. കരുണാകരന്‍. ഫിബ്രവരി 22 ശനിയാഴ്ച ദില്ലിയില്‍ നിന്ന് മടങ്ങിയെത്തിയ അദ്ദേഹം തിരുവനന്തപുരം വിമാനത്താവളത്തില്‍ വാര്‍ത്താലേഖകരോട് സംസാരിക്കുകയായിരുന്നു.

നിഷ്പക്ഷമായി അന്വേഷണം നടത്തി റിപ്പോര്‍ട്ട് സമര്‍പ്പിക്കാവുന്ന കഴിവുള്ള ഏജന്‍സിയെ ഏല്പിക്കണം. ആദിവാസികളുടെ സമരത്തെ സര്‍ക്കാര്‍ കൈകാര്യം ചെയ്ത രീതി ശരിയല്ല. - കരുണാകരന്‍ പറഞ്ഞു.

സ്വയംഭരണം പ്രഖ്യാപിക്കാന്‍ ശ്രമിച്ച ആദിവാസികളെ അടിച്ചമര്‍ത്തുക തന്നെ വേണമെന്ന് സ്പീക്കര്‍ വക്കം പുരുഷോത്തമന്‍ നിയമസഭയില്‍ നടത്തിയ പരാമര്‍ശത്തോടും കരുണാകരന്‍ പ്രതികരിച്ചു. സ്പീക്കറുടെ സ്ഥാനത്തിരുന്ന് വക്കം പുരുഷോത്തമന്‍ ഒരിക്കലും ഇത് പറയാന്‍ പാടില്ലായിരുന്നു. - കരുണാകരന്‍ അഭിപ്രായപ്പെട്ടു.

ഇത്രയും ചുരുങ്ങിയ ആളുകളെ നേരിടാന്‍ ഇത്രയധികം പൊലീസുകാരെ വിളിച്ചുവരുത്തേണ്ട കാര്യമുണ്ടായിരുന്നോ എന്നും കരുണാകരന്‍ ചോദിച്ചു.