25% സീറ്റ്: കോളജുകള് വിധിവരെ കാക്കും
കൊച്ചി: സ്വാശ്രയ മെഡിക്കല് കോളജുകളില് സര്ക്കാര് ക്വാട്ടയില് അനുവദിച്ച 25 ശതമാനം സീറ്റുകളിലേക്ക് പ്രവേശനം നടത്തുന്നതിന് സുപ്രിം കോടതി വിധി വരെ കാത്തിരിക്കുമെന്ന് പുഷ്പഗിരി, കോലഞ്ചേരി മെഡിക്കല് കോളജുകള് അറിയിച്ചു.
സര്ക്കാര് ക്വാട്ടയിലെ പ്രവേശനനത്തിന് ലിസ്റ് നല്കാന് ഹൈക്കോടതി അനുവദിച്ച ഒരാഴ്ച സമയം ഫിബ്രവരി 23 ഞായറാഴ്ച കഴിഞ്ഞു. ഒരാഴ്ചയ്ക്കുള്ളില് സര്ക്കാര് ലിസ്റ് നല്കിയില്ലെങ്കില് മാനേജ്മെന്റുകള്ക്ക് ഈ സീറ്റുകളിലേക്ക് പ്രവേശനം നല്കാമെന്ന് ഹൈക്കോടതി ഉത്തരവില് വ്യക്തമാക്കിയിരുന്നു. എന്നാല് ഈ ആനുകൂല്യം ഉപയോഗിക്കാതെ സുപ്രിം കോടതി വിധി വരുവരെ കാത്തിരിക്കാനാണ് പുഷ്പഗിരി, കോലഞ്ചേരി മെഡിക്കല് കോളജ് മാനേജ്മെന്റുകളുടെ തീരുമാനം.
സര്ക്കാരുമായി ഒരു ഏറ്റുമുട്ടലിന് തങ്ങളില്ലെന്ന് കോലഞ്ചേരി മെഡിക്കല് കോളജ് പ്രത്യേക കമ്മിറ്റി ചെയര്മാന് സി. വി. ജേക്കബ് പറഞ്ഞു.
അമ്പത് ശതമാനം സീറ്റുകളിലേക്ക് സര്ക്കാര് ക്വാട്ടയില് പ്രവേശനം നല്കാന് തയ്യാറായ കോളജുകള്ക്ക് മാത്രമേ ലിസ്റ് നല്കുകയുള്ളൂവെന്ന് മുഖ്യമന്ത്രി എ. കെ. ആന്റണി നേരത്തെ അറിയിച്ചിരുന്നു.