നളിനി നെറ്റോ കേസ്: നീലന്റെ ഹര്ജി തള്ളി
കൊച്ചി: നളിനി നെറ്റോ കേസില് മുന്മന്ത്രി നീലലോഹിതദാസന് നാടാര് സമര്പ്പിച്ച ഹര്ജി ഹൈക്കോടതി തള്ളി.
കേസില് നിന്ന് തന്നെ ഒഴിവാക്കണമെന്നും കേസിലെ നടപടികള് നിര്ത്തിവയ്ക്കണമെന്നും ആവശ്യപ്പെട്ട് തിരുവനന്തപുരം ഒന്നാം ക്ലാസ് ജുഡീഷ്യല് മജിസ്ട്രേറ്റിന് നല്കിയ ഹര്ജി തള്ളിയതിനെ ചോദ്യം ചെയ്താണ് നീലലോഹിതദാസ നാടാര് ഹൈക്കോടതിയില് ഹര്ജി നല്കിയത്.
ഐ എ എസ് ഉദ്യോഗസ്ഥയായ നളിനി നെറ്റോയെ പീഡിപ്പിക്കാന് ശ്രമിച്ചുവെന്നാണ് നീലനെതിരെയുള്ള കേസ്. കേസില് തന്റെ ഗണ്മാനെയും സന്ദര്കരെയും സാക്ഷികളായി ഉള്പ്പെടുത്തിയിട്ടില്ലെന്ന് നീലന് ഹര്ജിയില് ചൂണ്ടിക്കാട്ടി.
1999 ഡിസംബര് 21ന് മന്ത്രിയുടെ ചേംബറില് വെച്ച് ഔദ്യോഗിക ചര്ച്ചയ്ക്കായി ക്ഷണിക്കപ്പെട്ട നളിനി നെറ്റോയുടെ കൈകളില് പിടിക്കുകയും ചുംബിക്കാന് ശ്രമിക്കുകയും ചെയ്തെന്നും കുതറിമാറാന് ശ്രമിക്കുന്നതിനിടയില് നളിനി നെറ്റോയ്ക്ക് പോറലേറ്റെന്നുമാണ് ആരോപണം.