മുത്തങ്ങ: നിരാഹാരം തുടങ്ങി
തിരുവനന്തപുരം: മുത്തങ്ങ സംഭവത്തെ കുറിച്ച് ജുഡീഷ്യല് അന്വേഷണം നടത്തമെന്ന് ആവശ്യപ്പെട്ട് സി പി എം നേതാവും മുന്മന്ത്രിയുമായ കെ. രാധാകൃഷ്ണന് നിയമസഭാ കവാടത്തില് നിരാഹാര സത്യഗ്രഹം ആരംഭിച്ചു.
മുത്തങ്ങ സംഭവത്തില് ജുഡീഷ്യല് അന്വേഷണം നടത്താന് തയ്യാറാവാത്തതില് പ്രതിഷേധിച്ച് ഫിബ്രവരി 25 ചൊവാഴ്ചയും പ്രതിപക്ഷം നിയമസഭയില് നിന്ന് ഇറങ്ങിപ്പോക്ക് നടത്തി.
സംഭവവുമായി ബന്ധപ്പെട്ട് അടിയന്തിര പ്രമേയത്തിന് അനുമതി തേടാനായി പ്രതിപക്ഷം മുതിര്ന്നപ്പോള് തന്നെ അനുമതി നല്കാനാവില്ലെന്ന് സ്പീക്കര് വ്യക്തമാക്കി. തുടര്ന്ന് ഇറങ്ങിപ്പോയ പ്രതിപക്ഷം അല്പം കഴിഞ്ഞ് തിരിച്ചെത്തി.
സര്ക്കാര് സ്വീകരിക്കുന്നത് നിഷേധാത്മക നിലപാടാണെന്നും സര്ക്കാര് നിലപാടില് പ്രതിഷേധിച്ച് കെ. രാധാകൃഷ്ണന് നിയമസഭാ കവാടത്തിന് മുന്നില് നിരാഹാര സത്യഗ്രഹം തുടങ്ങുന്നതായും കോടിയേരി ബാലകൃഷ്ണന് അറിയിച്ചു.
നിയമസഭാ കവാടം സമരവേദിയാക്കുന്നത് നിയമവിരുദ്ധമാണെന്നും സമരം നടത്തിയാല് ആവശ്യമായ നടപടികള് സ്വീകരിക്കേണ്ടിവരുമെന്നും സ്പീക്കര് വക്കം പുരുഷോത്തമന് പറഞ്ഞു.