ഐസകിനെ എം. പി.ഗംഗാധരന്‍ സന്ദര്‍ശിച്ചു

തിരുവനന്തപുരം: മുത്തങ്ങ സംഭവത്തില്‍ ജുഡീഷ്യല്‍ അന്വേഷണം നടത്തണമെന്ന് ആവശ്യപ്പെട്ട് നിരാഹാര സത്യഗ്രഹം നടത്തുന്ന തോമസ് ഐസക് എം എല്‍ എയെ കോണ്‍ഗ്രസ് നിയമസഭാകക്ഷി ഉപനേതാവ് എം. പി. ഗംഗാധരന്‍ സന്ദര്‍ശിച്ചു.

മുത്തങ്ങ സംഭവത്തില്‍ ജുഡീഷ്യല്‍ അന്വേഷണം നടത്തണമെന്നും ഉത്തരവാദപ്പെട്ട മന്ത്രിമാരെ മാറ്റിനിര്‍ത്തണമെന്നും ഐ ഗ്രൂപ്പ് ആവശ്യപ്പെടുന്ന പശ്ചാത്തലത്തിലാണ് ഗംഗാധരന്റെ സന്ദര്‍ശനം.

അതേ സമയം സന്ദര്‍ശനം സൗഹൃദപരമാണെന്ന് ഗംഗാധരന്‍ പറഞ്ഞു. മുത്തങ്ങ സംഭവത്തില്‍ ഐ ഗ്രൂപ്പിന്റെ നിലപാട് സംബന്ധിച്ച് ഒന്നും പറയാന്‍ ഗംഗാധരന്‍ തയ്യാറായില്ല.

തോമസ് ഐസക്കിന്റെ അനിശ്ചിത കാല നിരാഹാര സത്യഗ്രഹം മാര്‍ച്ച് മൂന്ന് തിങ്കളാഴ്ച നാലാം ദിവസത്തിലേക്ക് കടന്നിരിക്കുകയാണ്.