ഹര്‍ത്താല്‍ സിബിഎസ്ഇ പരീക്ഷയെ ബാധിക്കും

കൊച്ചി: മുത്തങ്ങ സംഭവത്തില്‍ ജുഡീഷ്യല്‍ അന്വേഷണം നടത്തണമെന്നാവശ്യപ്പെട്ട് എല്‍ ഡി എഫ് മാര്‍ച്ച് 11ന് നടത്തുന്ന ഹര്‍ത്താല്‍ സി ബി എസ് ഇ പരീക്ഷയെഴുതുന്ന വിദ്യാര്‍ത്ഥികളെ ബാധിക്കും.

പത്താം ക്ലാസിലെയും 12-ാം ക്ലാസിലെയും വിദ്യാര്‍ഥികള്‍ക്ക് മാര്‍ച്ച് 11ന് പരീക്ഷയുണ്ട്. കഴിഞ്ഞ വര്‍ഷം പരീക്ഷാ ദിവസം ഹര്‍ത്താലുണ്ടായിരുന്നതിനാല്‍ പല വിദ്യാര്‍ഥികള്‍ക്കും ഒരു വര്‍ഷം നഷ്ടപ്പെട്ടിരുന്നു.

കേരളത്തിലെ 400 സ്കൂളിലെ 50,000 ഓളം വിദ്യാര്‍ത്ഥികളാണ് സി ബി എസ് ഇ പരീക്ഷയെഴുതുന്നത്. പരീക്ഷയെഴുതാനുള്ള ബുദ്ധിമുട്ട് പരിഹരിക്കാനായി വിദ്യാര്‍ഥികളെ ഹര്‍ത്താലില്‍ നിന്നും ഒഴിവാക്കണമെന്ന് കേരള സി ബി എസ് ഇ സ്കൂള്‍സ് മാനേജ്മെന്റ് അസോസിയേഷന്‍ എല്‍ ഡി എഫിനോട് ആവശ്യപ്പെട്ടിട്ടുണ്ട്. എല്‍ ഡി എഫ് നേതൃത്വത്തില്‍ നിന്നും ഇതിനോട് പ്രതികരണമൊന്നും ഇതുവരെയുണ്ടായിട്ടില്ല.

മാര്‍ച്ച് 11ന് പത്താം ക്ലാസിലെ പരീക്ഷ പ്രാദേശിക ഭാഷാ പേപ്പറാണ്. 12-ാം ക്ലാസില്‍ സയന്‍സ് വിഭാഗത്തിന് കെമിസ്ട്രിയും. പ്രവേശനപരീക്ഷയ്ക്ക് തയ്യാറെടുക്കുന്ന വിദ്യാര്‍ഥികള്‍ക്ക് കെമിസ്ട്രി വളരെ പ്രധാനപ്പെട്ട വിഷയമാണ് .

കഴിഞ്ഞ വര്‍ഷം വി എച്ച് പിയുടെയും ഇടതുപക്ഷ ജീവനക്കാരുടെയും ഹര്‍ത്താലുണ്ടായിരുന്നതിനാല്‍ പല വിദ്യാര്‍ഥികളും രക്ഷിതാക്കളും പരീക്ഷയെഴുതുന്ന സ്കൂളിന് സമീപം തന്നെ താമസസൗകര്യം ഏര്‍പ്പാടാക്കുകയായിരുന്നു. നഗരങ്ങളില്‍ തന്നെ താമസിക്കുന്നവര്‍ക്ക് സ്കൂളുകളിലെത്താന്‍ ബുദ്ധിമുട്ടുണ്ടാവില്ല. എന്നാല്‍ ഗ്രാമപ്രദേശങ്ങളില്‍ നിന്ന് വരുന്നവരുടെ സ്ഥിതി ഇതല്ല.

ചില സ്കൂള്‍ മാനേജ്മെന്റുകള്‍ ഹര്‍ത്താലിന്റെ തലേദിവസം സ്കൂളുകളില്‍ തന്നെ വിദ്യാര്‍ഥികള്‍ക്ക് താമസസൗകര്യമൊരുക്കാനുള്ള ഏര്‍പ്പാടുകള്‍ ചെയ്യുകയാണ്.