ഗണേഷ് മുഖ്യമന്ത്രിക്ക് രാജി നല്കി
തിരുവനന്തപുരം: ഗതാഗതമന്ത്രി ഗണേഷ്കുമാര് മുഖ്യമന്ത്രി എ.കെ. ആന്റണിക്ക് രാജിക്കത്ത് നല്കിയെന്ന് കേരളകോണ്ഗ്രസ് (ബി) ചെയര്മാന് ആര്. ബാലകൃഷ്ണപിള്ള അറിയിച്ചു. മാര്ച്ച് ആറ് വ്യാഴാഴ്ച വാര്ത്താലേഖകരോടാണ് ബാലകൃഷ്ണപിള്ള ഇക്കാര്യം പറഞ്ഞത്.
പകരം പിള്ളയെ മന്ത്രിയാക്കണമെന്ന് കേരള കോണ്ഗ്രസ്(ബി) മുഖ്യമന്ത്രിയോട് ആവശ്യപ്പെട്ടിട്ടുണ്ട്. ഇതോടെ കേരള കോണ്ഗ്രസ്(ബി) ചെയര്മാന് ആര്. ബാലകൃഷ്ണപിള്ള മന്ത്രിയാകുമെന്ന് ഏറെക്കുറെ ഉറപ്പായി.
മാര്ച്ച് ആറ് വ്യാഴാഴ്ച ഉച്ചയോടെയാണ് ഗണേഷ്കുമാര് തന്റെ രാജിക്കത്ത് മുഖ്യമന്ത്രിയുടെ ഔദ്യോഗിക വസതിയില് എത്തിച്ചത്. കേരള കോണ്ഗ്രസ്(ബി)യുടെ ഔദ്യോഗിക തീരുമാനപ്രകാരമായിരുന്നു ഗണേഷ്കുമാറിന്റെ രാജിക്കത്ത് നല്കിയതെന്ന് ബാലകൃഷ്ണപിള്ള പറഞ്ഞു. പകരം പിള്ളയെ മന്ത്രിയാക്കണമെന്ന പാര്ട്ടി നിര്ദേശവും മുഖ്യമന്ത്രിയെ അറിയിച്ചിട്ടുണ്ട്.
കഴിഞ്ഞയാഴ്ച ഗണേഷ്കുമാര് മന്ത്രിസ്ഥാനത്ത് നിന്നും രാജിവയ്ക്കുന്നതായി പ്രഖ്യാപിക്കുന്ന കത്ത് പാര്ട്ടിചെയര്മാന് കൂടിയായ അച്ഛന് ബാലകൃഷ്ണപിള്ളയെ ഏല്പിച്ചിരുന്നു. ഗ്രാഫൈറ്റ് കേസില് ബാലകൃഷ്ണപിള്ളയെ സുപ്രീംകോടതി കുറ്റവിമുക്തനാക്കിയതിനെ തുടര്ന്നാണ് ഗണേഷ്കുമാര് അച്ഛന് രാജിക്കത്ത് നല്കിയത്.
1980ല് മന്ത്രിയായിരിക്കേയാണ് കര്ണ്ണാടകയിലെ ഗ്രാഫൈറ്റ് കമ്പനിക്ക് വൈദ്യുതി മറിച്ചുവിറ്റ് കോടികള് സമ്പാദിച്ചുവെന്ന ആരോപണമുണ്ടായത്. കഴിഞ്ഞ ദിവസം ഈ കേസില് പിള്ളയെ സുപ്രീംകോടതി കുറ്റവിമുക്തനാക്കി.